Toyota Land Cruiser 300 біздің елде 1 шілдеде ресми сатылымға шығады. Жол талғамайтын көліктің жеті нұсқасы және олардың бағасы белгілі болды.
LC 300-дің базалық нұсқасы «Терра» деп аталады. Оған 275 ат күші мен 385 Нм момент беретін бұрынғы 4 литрлік 1GR-FE моторы қойылған. Агрегат бұрыннан таныс 6 сатылы автоматпен жұмыс істейді. Автокөлік 7 орынды болады және 18 дюймдік дөңгелек орнатылған. Жол талғамайтын көлік сегіз қауіпсіздік жастығы, круиз-бақылау, екі аймақты климат-бақылау, әйнек жылытқыш және 9 дюймдік дисплейі бар мультимедиа кешенімен жабдықталады. Орындықтар матамен қапталған. Мұндай Land Cruiser 35.3 млн теңге тұрады.
4 литрлік мотор қойылған, бірақ әлдеқайда жақсы жабдықталған «Престиж 4.0» нұсқасын алуға болады. Машинада Crawl Control және өрден түсу кезінде көмек беру жүйесі (DAC), бұғатталатын артқы дифференциал, жарықдиодты тұманға қарсы шам, парктроник, люк, алдыңғы орындықтарды жылытқыш, Toyota Safety Sense қауіпсіздік кешенінің толық жиынтығы бар. Орындықтар былғарымен қапталған. Бағасы — 39.5 миллион теңге.
41.1 миллион төлеп, 4.0 литрлік моторды 415 ат күшіне ие (650 Нм) турбоүрлемді 3.5 литрлік қозғалтқышқа ауыстыруға болады. Ол 10 сатылы автоматпен жұмыс істейді. V6-ға қосымша тағы екі қауіпсіздік жастығы, жүріс режимін таңдау, жолсызбен жүруге арналған Multi-Terrain Select жүйесі, көрінбейтін аймақты бақылау, артқы көрініс камерасының шайбасы, жүксалғыш есігінің электр жетегі, 7 дюймдік экраны бар аспаптар панелі, сымсыз қуаттағыш, төрт аймақты климат-бақылау, жылытқышы бар рөл және басқа да бірқатар функция ұсынылады. Бірақ машинада үшінші қатардағы орындықтар мен бұғатталатын артқы дифференциал болмайды.
Комплектацияның толық сипаты мен салыстыру мүмкіндігі Kolesa.kz қосымшасындағы «Салонда тұрған жаңа автокөліктер» бөлімінде қолжетімді.
Land Cruiser-дің ең қымбат нұсқасы — «Премиум». Ол тек 3.5 литрлік мотормен ұсынылады. Салонда он қауіпсіздік жастығы, жүріс режимдері тізімінде Sport және Sport+ бар, бейімді аспа орнатылған, 12.3 дюймдік экраны бар мультимедиа кешені, панорамалы камера, барлық орындықты жылыту және желдету, артқы жолаушыларға арналған қосымша дисплей және тағы басқа мүмкіндіктер жетерлік. Автокөліктің бағасы — 49.2 миллион теңге. «Үш жүздік» 20 дюймдік дөңгелегі және аэродинамикалық бастырығымен назар аудартады. Жиынтығы бірдей, бірақ сыртындағы мерейтойлық тақтайшамен ерекшеленетін нұсқасы қолжетімді болады. Мұндай машинаны 49.7 миллион теңгеге аласыз.
Бағасы 43.9 млн теңге тұратын мерейтойлық «70th Anniversary» нұсқасын да айта кеткен жөн. Ол барынша агрессивті көрінетін 18 дюймдік шиналарымен, бұғатталатын алдыңғы, орталық және артқы дифференциал, e-KDSS жүйесі, бейімді аспа және жетілдірілген мультимедиа кешенімен ерекшеленеді.
Күзде Land Cruiser топтамасы Gazoo Racing нұсқасымен толығады. Онымен бірге 3.3 литрлік дизельді мотор Қазақстанға келуі мүмкін.
Айта кетейік, ресми сатылым 1 шілдеде басталғанымен, автосалонға келіп, Land Cruiser 300 сатып алу оңай болмайды. Өйткені машинаның алғашқы партиясы тұсаукесерден бұрын сатылып кетті, модельге алдын ала тапсырыс бергендер де көп. Марка дилерлеріне шілденің басында жүгінген клиенттер жол талғамайтын көлікті 2022 жылы алуы мүмкін.
Комментариев: 0