Күйік асуында ірі жол апаты болды

Жол апаты бүгін, 15 маусымда түнгі сағат үш шамасында Жамбыл облысындағы «Батыс Еуропа — Батыс Қытай» тас жолының 544-шақырымында, Күйік асуында болды. Қолда бар мәлімет бойынша Scania жүк көлігінің тіркемесі техникалық ақау себебінен өртенеді. Осыған байланысты көліктер бөгеліп қалған. 40 минуттан кейін жолда тұрған машиналарға жоғары жылдамдықта келе жатқан DAF соғылды.

Салдарынан жүк көлігінен бөлек екі Toyota Camry, Audi 100, екі Van Hool жолаушылар автобусы, Chevrolet Cobalt, Mercedes-Benz Sprinter, BMW X5, Toyota Alphard және Audi 80 зақымданды. Екі автобус, DAF жүк көлігі және Audi өртенді. Автобустардың бірінде 31 Өзбекстан азаматы отырған.

Toyota Camry жолаушысы оқиға орнында жан тапсырған, тоғыз адам емханаға жеткізілді. Олардың үшеуі жансақтау бөлімінде жатыр.

Қылмыстық кодекстің 345-бабы 3-бөлігі бойынша сотқа дейінгі тергеу басталды. Кінәлі азамат 5 жылға бас бостандығынан айырылып, 5 жыл көлік жүргізе алмайды.

Полиция мәліметінше «Батыс Еуропа — Батыс Қытай» тас жолының 554-шақырымы, Күйік асуынан түсетін жолмен жүк көлігінің жүруіне тыйым салынған, онда «Жүк көлігінің жүруіне тыйым салатын» 3.4 белгісі орнатылған. Бірақ жүргізушілер оған немқұрайлы қарайды. Ережені елемеудің соңы осындай қайғылы жағдайға себеп болып отыр.