Аспан асты еліндегі вирусологтар жариялаған тың мәліметтерге сүйенсек, қоғамдық көлікте инфекция жұқтырған адам шығып кеткеннен кейін де қауіпті кеселге ұшырауға болады екен. Ал аурудан аулақ болу үшін адамдар арасындағы қашықтық кемі төрт жарым метр болуы қажет, бірақ мұның мүмкін емес екенін бәріміз білеміз.
22 қаңтар күні өзін нашар сезінсе де, қауіпті кесел жұқтырғанын білмеген жолаушы лық толы қалааралық автобусқа мінеді де, артқы қатарға жайғасады. Ол сәтте коронавирус туралы ақпарат кең таралмаған, сол себепті медициналық маска таққан адам болмапты.
Салондағы бейнетіркеуіш жазбалары төрт сағат бойы оның басқалармен еш қатынасқа түспегенін көрсеткен. Алайда вирус одан алты қатар алыс (4.5 метр) отырғандарды қоса алғанда, айналасындағы жеті адамға жұққан. Одан бөлек, автобус діттеген жеріне жетіп, босағаннан кейін мінген жолаушы да жұқтырыпты. Бірақ бұл таңғаларлық құбылыс емес, себебі COVID-19 металл, әйнек сынды дүниелердің бетінде де бірнеше күн өмір сүре алады.
Ғалымдар салқындатқыш орнатылған жабық ортада вирустардың анағұрлым ұзақ қашықтыққа таралатынын айтады. Басқаша айтқанда, қоғамдық көлік қана емес, ауа ағындарын реттеу мен жылытудың орталық жүйесіне ие ғимараттар да аса қауіпті.
Комментариев: 0