Көлікте жарық шағылыстырғыш кеудеше болуы керек пе?

Елдегі телеарналар жүргізуші дәрі қобдишасы, өрт сөндіргіш және жарық шағылыстырғыш кеудеше сияқты заттарды алып жүруге тиіс деп жарыса хабарлап жатыр. Олардың дерегінше патруль бұларды салоннан таппаса, айыппұл салады. Мұны әлеуметтік желідегі пабликтер іліп ала кетті де, полиция қаптап жүрген Шымкентте аталған атрибутиканың бағасы шарықтай бастады. Қазір жүргізушілер кеудешені 3 мың теңгеге алып жатыр.

Ережеге сай жүргізушінің жинағында не болуға тиіс?

Жол ережесінде бұған қатысты нақты норма жоқ, бірақ қосымша құжаттар мен көлік құралын пайдалануға тыйым салатын арнайы тізімде егер автобус, жеңіл машина және жүк көлігінде не дөңгелекті тракторда медициналық дәрі қобдишасы, өрт сөндіргіш, апаттық тоқтау белгісі (жыпылықтап тұратын қызыл шам) болмаса, оны жүргізуге рұқсат етілмейді деп жазылған. Ал бүйірлік тіркемесі бар мотоцикл үшін маңыздысы — дәрі қобдишасы мен апаттық тоқтау белгісі (шам).

Тізімге жарық шағылыстырғыш кеудеше енбеген.

Жол ережесінің 171-бабы мен «Жол жүрісі туралы» заңның 57-бабында ғана жарық шағылыстырғыш заттар туралы норма бар, оған сәйкес «жол жүрісі қағидаларында айқындалған талаптарға сәйкес келетін, басқа көлік құралын жүргізушілерге көрінуді қамтамасыз ететін жарық шағылыстыратын затсыз қараңғыда жолға шығуға тыйым салынады».

Жарық шағылыстырғыш зат — қараңғыда немесе төңірек дұрыс көрінбеген кезде жарық сәулесін өз көзіне кері қайтарып, жарқырап көріну қасиетіне ие арнайы материалдан жасалған бұйым, ол жақын жерге түсетін шам жанып тұрса 150 м, алысқа түсетін шам жанса, 400 м қашықтан көзге түседі. Бұл киім немесе киімдегі элемент болуы мүмкін. Біз сөз етіп отырған кеудеше осы санатқа кіреді.

Негізі, кез келген жүргізуші кеудеше алып жүргені жөн, ол апат салдарынан түнде еріксіз тоқтағанда қажетке жарайды. Күндіз де ашық түсті кеудеше киіп алған адам алыстан анық көрінеді. Бірақ автомобилист оны алуға міндетті емес, билік тек кеңес береді, сондықтан жазаламайды.

Тәртіп сақшылары машинаны тоқтатып, дәрі қобдишасы, өрт сөндіргіш және апаттық тоқтау белгісі бар-жоғын тексеруге құқылы. Дегенмен ол үшін хаттама толтырып, процесті камераға түсіруі керек.

Мұндай заттары жоқ азамат 5 АЕК (биыл 21 625 теңге) айыппұл төлейді.