Көлік салығы дұрыс есептелмесе не істеу керек?

Наурыздың аяғында Александр К. есімді оқырман Kolesa.kz редакциясына хабарласып, проблемасын айтты. Оның меншігінде жеңіл автомобиль мен үш мотоцикл болған. Александрға көлік салығын төлеу туралы хабарлама келген. Машинаға салық дұрыс есептелген. Ал мотоциклдер үшін он есе көп төлеуге тура келіпті.

ҚР Салық кодексіне сай қозғалтқыш қуаты 55 кВт-тан (75 ат күші) аспайтын мотоцикл үшін 2023 жылы 1 АЕК (3450 теңге) салық төлеу керек. Ал қуаты 55 кВт-тан асса, он есе жоғары (10 АЕК) болады. Александрдың атындағы үш мотоциклдің қуаты 55 кВт-қа жетпейді, бұған дейін ол әрқайсысы үшін бір АЕК төлеп жүрген. Бірақ 2023 жылғы салық сомасы жүз мың теңге болған.

«Бұл қалай?» — деп сұрады Александр редакциямыздан, біз оның сұрағын Қаржы министрлігінің Мемлекеттік кірістер комитетіне жолдадық. Өйткені кейінгі кезде салық ставкасы өзгерген жоқ.

МКК өкілдері салық полицияның тіркеу дерегі бойынша есептелгенін айтты. Салық қызметкерлері бір мотоцикл салығын қате есептегенін мойындады. Сома артық есептелген, ол түзеледі. Бірақ қалған екеуіне салық дұрыс есептелген, әрқайсысына 34 500 теңгеден төлеу керек.

Мұнда сәйкес келмейтін тұстар көп. Бір мотоциклдің қуаты — 49 кВт, екіншісі — 50 кВт, үшіншісі — 55 кВт. Үшеуі де 1 АЕК мөлшерінде салық төлеу шартына сәйкес келіп тұр.

Біз Александрға уақыт өткізбей аудандық мемлекеттік кірістер департаментіне баруға кеңес бердік. Бұл салық төлейтін соңғы күн —1 сәуір болатын. Александр өзі сияқты қате есептелген салық мәселесімен кезекте тұрған адамдармен бірге МКД қызметкерлеріне мотоциклдерінің техпаспортын көрсетіп, бәрінің қуаты 55 кВт-тан аспайтынын дәлелдеген. Салық органдары қатені мойындап, деректер базасындағы мәліметті өзгертті. Александр үш мотоцикл үшін 103 500 емес, 10 350 теңге төледі.

Осы оқиғаға қарап, көлік иелеріне банк қосымшасына келген салық сомасын қайта есептеп көруді ұсынамыз:

• Kolesa.kz сайтындағы арнайы бөлім;
• kgd.gov.kz web-порталы;
• e-Salyq Azamat мобильді қосымшасы.

Салық сомасы артық не кем есептелсе, айыппұл келгенін күтпей аудандық мемлекеттік кірістер департаментіне барған жөн. Түбіртекте, банк қосымшасында қозғалтқыш көлемі немесе автомобиль санаты қате жазылуы мүмкін. Мемлекеттік органдардың деректер базасынан үнемі қате шығып тұрады.

Сондай-ақ App Store және Play Market арқылы жүктеп алуға болатын e-Salyq мобильді қосымшасының «Салық әмияні» қызметі арқылы онлайн өтінім беруге және қате деректі түзетуге болады. Қосымшада автомобильдің дұрыс деректері жазылған құжат көшірмесін көрсетуге мүмкіндік бар. Бірақ онлайн болса да қатені түзетуге бірнеше күн кетеді.