Естеріңізге сала кетейік, наурыз айында алматылық полицейлер Достық даңғылынан қақпақ астына арнайы дабыл белгісі мен жалған нөмір орнатып, жүк салғышына травматикалық қару мен бір бума жалған көк қағазды салып алып жүрген Toyota Camry 70 көлігін ұстаған болатын. Тексеру жұмыстары жүргізілгеннен кейін іс Мамандандырылған ауданаралық әкімшілік сотқа жолданған еді.
Zakon.kz хабарлағандай, істі қарау барысында Camry-дің рөлінде Талдықорғанның бұрынғы әкімінің (Осы оқиғадан бірнеше күн өтісімен шенеунік басқа қызметке ауыстырылған. Енді ол «Қорғас» ШЫХО-на жетекшілік етеді) ұлы Тұрлыхан Тұрарбектің курстасы — Арлан Шәріповтің отырғаны белгілі болды. Ол 2018 жылдың ақпан айында да бөтен көлікті тізгіндеп, жол апатына түсіпті.
Бұл жолғы құрықтау барысында тәртіп сақшылары Шәріповке қатысты ҚР ӘҚБК-нің 590-бабының 5-бөлігі (көлік құралдарын пайдалану ережелерін бұзу), 612-бабының 2-бөлігі (жүргізуші куәлігі мен көлік құралын басқаруға құқығы жоқ адамның оны басқаруы) және 603-бабы ( көлiк құралына арнайы жарық және (немесе) дыбыс сигналдарын беруге арналған құрылғыларды орнату қағидаларын бұзу) бойынша үш хаттама толтырды. Тағылған айыптардың соңғысы істің сотта қаралуын қажет етеді.
Тергеу кезінде Шәріпов арнайы белгілерді көлікке өзінің орнатпағанын мәлімдеген еді, алайда сот барысында берген түсінігін өзгерткен ол, бар кінәні өз мойнына алып, кінәсін мойындайтынын және ендігәрі мұндай әрекетке бармайтынын айтты. Нәтижесінде сот Әуезов аудандық ювеналды полиция бөліміне жеке қаулы шығарып, полицейлерді Шәріповті есепке алуға міндеттеді, ал арнайы дабылды заңсыз орнатып, ереже бұзған азаматқа 10 АЕК, яғни 25 250 теңге көлемінде айыппұл салды. Заңда бұл әрекет үшін 25 АЕК көлемінде айыппұл салу көзделген, алайда заң бұзушы кәмелетке толмағандықтан айыппұл сомасы төмендетілді.
Комментариев: 0