Кабриолет Қазақстан нарығында сирек кездеседі. Kolesa.kz-те сатылып жатқан мұндай машиналардың саны 100-ге де жетпейді. Салыстыру үшін айтсақ, сайтта 74 мыңға жуық седан (барлық хабарландырудың жартысына жуығы) сатылымға қойылған. Дегенмен кабриолет немесе родстер сатып алғысы келетін жүргізушілер аз емес. Ендеше, сатылымдағы ерекше көліктермен танысайық.
2005 жылы шыққан Porsche 911 Carrera S
Қазақстан жолдарында төбесі ашық нұсқасын айтпағанда, әдеттегі Porsche 911-дің өзі тым сирек көзге түседі. Бұл спорткар конвейерден 2005 жылы шыққан, 997 индексіне ие модельдің алғашқы нұсқаларының бірі. Олар 2004 жылдан 2013 жылға дейін шығарылған болатын.
Біз сөз етіп отырған Carrera S алдыңғы жетекті, капот астына 360 ат күшіне ие 3.8 литрлік атмосфералы мотор орнатылған. Ол автоматпен жұптаса жұмыс істейді.
Шыққанына ұзақ жыл өтсе де, «911» 60 мың шақырым ғана жол жүрген. Бағасы — 20 млн теңге.
2012 жылғы Infiniti G37
Infiniti G сериясының кабриолет нұсқасы төртінші буындағы модельдің тұсаукесерінен кейін ғана жарық көрді. Жиналмалы шатыры бар алғашқы екі есікті машина 2009 жылдың ортасында шығарылды. Бір жылдан кейін модель жеңіл рестайлингтен өтті.
Сатылып жатқан көлік 2012 жылы шыққан, әрі тоғыз жылдан бері 31 мың шақырым ғана жол жүріпті. Бұл G37 Қазақстанға 2013 жылы келген екен. Жеті жыл бойы машина бір адамның ғана қолында болды, қазіргі иесі — оны тізгіндеген екінші адам.
Кабриолет 333 ат күшіне ие 3.7 литрлік бензинді мотормен қозғалады. Агрегат 7 сатылы автоматпен жұмыс істейді. Сатылымға шыққан төбесі ашық жалғыз G37 12.8 млн теңгеге бағаланып отыр.
2003 жылғы 3-сериялы BMW
Төбесі ашық ерекше E46 туралы бұдан бір жыл бұрын жазған едік. Pandem бастырығына ие, BMW Individual Wildberry Red түсіне боялған және пневматикалық аспа арқылы төмендетілген кабриолет әлі жаңа иесін тапқан жоқ. Машина 9.5 миллион теңге тұрады. E46-ның капот астына бензинді қатарлы алтылық орнатылған (бірақ германиялық емес, жапониялық). Бұл — 400 ат күшіне ие 3 литрлік 2JZ-GTE моторы. Агрегат автоматпен жұмыс істейді.
2002 жылғы Lexus SC 430
2002 жылы шыққан Lexus SC430 қазірге дейін 120 мың шақырым жол жүріпті. Машина өте ерекше түске боялып, 18 дюймдік Rays дискілері орнатылған. Капот астына 290 ат күші мен 430 Нм момент беретін 4.3-литрлік V8 (3UZ-FE) қойылған. Ол 5 сатылы автоматпен жұмыс істейді.
Иесінің айтуынша, қозғалтқышы бабында, шанағының сырты бронды қабықшамен қапталған, дыбыс изоляциясы мінсіз. Төрт орынды екі есікті көлік 5.9 миллион теңгеге сатылады.
2002 жылы шығарылған Volvo C70
Kolesa.kz сайтында жалпы 220-ға жуық Volvo сатылып жатыр. Олардың арасында жалғыз кабриолет бар. Ол — 2002 жылғы C70. Машина 5.3 миллион теңгеге бағаланып отыр.
Бірінші буындағы Volvo C70 Қазақстанда ғана емес, тұтас әлемде сирек кездесетін көліктердің бірі. Сегіз жылда модельдің төбесі ашық нұсқасының 47 мың данасы ғана шығарылған.
Иесінің айтуынша, көлік біздің елге Жапониядан тапсырыспен жеткізілген, содан бері бір адамның қолында. Volvo өте сирек (демалыс күндері ғана) қолданылған.
Ол 2.4 литрлік турбоүрлемді мотормен қозғалады. 200 ат күшіне ие қозғалтқыш автоматпен жұмыс істейді. Машина алдыңғы жетекті.
әдемі көліктер