BMW компаниясы E30 индексі бар үлгісінің үшінші сериясын 1982 жылдың аяғында шығарды. Автокөлік тек Германияда ғана емес, Оңтүстік Африка, Тайланд және Индонезиядағы зауыттарда да өндірілді. Универсал шанағындағы E30-дың соңғы легі конвейерден 1994 жылы шыққан. Бұл уақытта үлгінің тиражы 2.4 млн данаға жеткен еді.
Қазіргі уақытта «отыздықтардың» қатары сиреген. Kolesa.kz порталынан олардың жүзге жуығын көруге болады. Көліктің бағасы 400 мың теңгеден басталып, 6 миллионға дейін барады. Біз ең қымбаттары жайлы сөз қозғамақпыз.
Kolesa.kz-тегі ең қымбат екі E30 бір-біріне мүлде ұқсамайды. Бірі қала ішінде асықпай қыдыруға арналған төбесі ашық көлік болса, енді бірі дрифтке арналған. Екеуі де 6 млн теңге тұрады.
1992 жылғы кабриолеттің иесі машина 102 мың шақырым жүргенін айтады. Диаметрі үлкен дөңгелектері мен сәл төмендетілген аспасын есепке алмағанда, жағдайы зауыттан шыққандағы қалпына жақын. Қақпақ астына 2 литрлік атмосфералы қозғалтқыш орнатылған, ол автоматты қораппен жұптаса жұмыс істейді. Хабарландыру авторының сөзінше, ол кабриолетті оны түпнұсқалық бөлшектермен қамтамасыз ете алатын адамға ғана береді, бірақ Автонесие арқылы сатуға да қарсы емес.
Ал жарысқа арналған BMW 1989 жылғы седанға негізделген. Болидке 3 литрлік қатарлы 2JZ-GTE қойылған, ол дизельді "«330» үлгісінен алынған қораппен жұмыс істейді.
Үшінші орында 1984 жылғы рестайлингке дейінгі E30 тұр. Оның бағасы 3.9 млн теңге. Хабарландыру авторы көліктің жетілдірілген тұстары жайлы көп айтпайды, есесіне суреттері жетерлік. 2 литрлік M52 моторына ие қызыл купенің күтімі жақсы. Мұнда Recaro орындықтары орнатылған қоңыр түсті былғары салон ерекше көз тартады.
Төртінші орын 1987 жылы шыққан Estoril blue түсіндегі BMW 325-ке тиесілі. Седан M3 стиліндегі аэродинамикалық етегімен, тамаша таңдалған дискілерімен және жаңа интерьерімен мақтана алады. Көлік иесінің айтуынша, салон толықтай қайта қапталып, спорттық орындықтар қойылған. Машина 3.8 млн теңгеге бағаланып отыр.
Бестікті жапониялық мотор орнатылған тағы бір спорттық «зеңбірек» түйіндейді. Бұл көлікке 2.5 литрлік 1JZ-GTE қозғалтқышы орнатылыпты. Машинаның бағасы 3.3 млн теңге.
Комментариев: 0