Kolesa.kz порталында 1982 жылғы ГАЗ-24-тің ерекше түрленімі пайда болды. Сырттай автомобиль тамаша жағдайымен, ірі дискілері, төмен профильді шинасы, өзгерген түсі және қымбат бағасымен назар аудартады. «Волга» 20 млн теңге тұрады.
Шын мәнінде, бұл жақсы сақталған ескі көлік қана емес, Lexus GS 430 базасында жасалған нағыз рестомод. Машинаның «лексуспен» байланысын салонынан байқайсыз. Кеңес дәуірінде жарық көрген көлікке жапон седанының алдыңғы панелін, ортаңғы консолі мен орындықтарын орнатыпты. Есік картасын жақсартып, былғарымен қаптаған. Хабарландыру авторы донордың барлық жүйесі дұрыс жұмыс істеп тұрғанын жазыпты, тіпті электр әйнек көтергіш те орнында екен.
Рестомод автомат қораппен жұмыс істейтін 4.3 литрлік V8 3UZ-FE арқылы қозғалады. Момент артқы дөңгелектере беріледі. Стандарт 3UZ моторында көлік жеткізілетін нарыққа байланысты 276-305 «арғымақ» болады. Сатушы берген мәлімет бойынша «Волганың» қуаты 40 күшке артқан.
Рестомодты иесі төрт жыл жасаған. Ал жобаны қайталаймын десеңіз, көлік иесі сұрағандай 20 млн емес, 25 млн теңге жұмсауға тура келеді екен.
Комментариев: 0