Белгісіз сатып алушы мұражайда тұрған өте сирек кездесетін экспонатты небәрі 6911 долларға (3 млн теңгеден сәл көп) алды. Cars&Bids аукционына шыққан кішкентай Corbin Sparrow осынша арзан бағаланды.
Corbin Sparrow 1999 жылы жарық көрген. Оны жасаған Майк Корбин электромобильді үйден жұмысқа жетуге қолайлы көлік құралы ретінде жобалаған. Бір орынды, үш дөңгелекті (артқы жетек) Sparrow 26 ат күшіне (135 Нм) ие электромотормен жүреді. Smart ForTwo-ден де кіші электрокар сағатына 120 км жылдамдықпен жүре алады, жүріс қоры — 80 шақырым.
Sparrow қарапайым болғанымен, электрлі әйнек көтергіші мен динамигі креслода орналасқан аудиожүйесі бар. Дөңгелегі 13 дюйм, бірақ спорткарларға қойылатын Wilwood тежеуішін орнатқан.
АҚШ тұрғындарына мұндай машина ұнамағандықтан, Майк Корбин жобасы сәтсіздікке ұшырады. 2003 жылы оның компаниясы банкрот болды, оған дейін 300 көлік шығарыпты. Аукционда сатылған автомобиль Петерсен музейінде ұзақ уақыт сақталған, бірақ мұражай қызметкерлері қазір оның жүрмейтінін айтады. Одометрі небәрі 2.7 мың шақырым көрсетіп тұр. Сатушы күштік құрылымын ауыстырса, сирек кездесетін электромобильді жүргізуге болатынын айтты.
Комментариев: 0