Заңнамаға енгізілетін тиісті өзгертулерге ҚР президенті қол қойды және олар ертең өз күшіне енеді. Орталық коммуникациялар қызметінің брифингінде ҚР Бас прокурорының орынбасары Марат Ахметжанов хабарлағандай, жыл сайын Қазақстанда ащы су ұрттап рөлге отырған 30 мыңнан аса жүргізуші анықталады екен, тек 2019 жылы мыңнан аса ел азаматы жол апатынан жарақат алған не көз жұмған. Бірақ ҚР Қылмыстық кодексінің 345-1-бабының пайда болуымен жағдай өзгеруі тиіс.
«Қазір сау жүргізуші үшін де, ішімдік ішіп көлік тізгіндегендер үшін де бір ғана норма бар. Егер қолданыстағы заңнама алкогольдік мас күйінде көлік тізгіндегендерді екі жылға дейін жүргізуші куәлігінен айыруды не 40 тәулікке дейін қамауға алуды қарастырса, ендігәрі олар бір жылға дейін бас бостандығынан айырылады және он жылға дейін жүргізуші куәлігінен қағылады. Жол апаты салдарынан адам қаза болған жадайда жеті жылдан он жылға дейін түрмеге қамалып, өмір бойына жүргізуші куәлігінен айырылады», — деді Ахметжанов.
Шендінің айтуынша, бұрын қандай да бір себеппен жүргізуші куәлігінен айырылса да, мас күйінде рөлге отырған азамат та көлік тізгіндеу құқығынан мәңгіге айырылады. Одан бөлек, масаң күйде ұсталған жүргізушілердің 30 тәулікке қамалуы мүмкін екендігін де хабарлады.
Осыдан біраз уақыт бұрын ҚР ІІМ елдегі жол апатының саны азаймай тұрғанын мойындаған болатын, әрі апаттың басым бөлігі мас күйдегі жүргізушілердің кесірінен болады екен.
Маскүнем жүргізушілерді түрмеге қамап, көлік жүргізу құқығынан мүлде айыру жөнінде ұсынысты мемлекет басшысы айтты.
Комментариев: 0