Ақтөбе тұрғыны Сергей Мунтянның BMW 728 автокөлігі зардап шеккен жол-көлік оқиғасы 2016 жылдың 27 мамырында түн мезгілінде орын алған екен. Жеңіс даңғылымен қозғалып келе жатқан жүргізуші, № 13 үйге қарама-қарсы жердегі шұқырға түсіп кеткен. Бумер бүлініп, оның рөлдік трапециясын, сайлентблоктарын, амортизаторларын, иінтіректерін, шанағының бөліктері мен дөңгелегін ауыстыруға және күрделі жөндеуден өткізуге тура келіпті. Жөндеу жұмыстарымен қатар, сараптамаға, мемлекеттік баж салығына және басқа да шығындарға кеткен қаражатты есептей келе, Мунтянның сотта жол мамандарынан талап еткен сомасы 625 мың теңгені құраған, — деп хабарлайды жергілікті «Актобе Таймс» басылымы.
2018 жылдың 14 қарашасында (екі жылдан астам уақыт өткен соң) жүргізушінің шағымын мемлекеттік айыптаушы қолдаған. Оның ойынша, Сергей Мунтянның автокөлігіне келген зақым үшін тұрғын үй-коммуналдық шаруашылығының қалалық бөлімі жауап беруге тиіс. Қалалық сот та талапкердің дәлелдерімен келісіп, ақтөбелік жол мамандарынан талап етілген барлық соманы, яғни 625 мың теңгені жүргізушінің пайдасына өндіру туралы қаулы қабылдады.
Комментариев: 0