Jaguar Land Rover зауыттарын қайта іске қосты

Jaguar Land Rover қыркүйектен бері тоқтап тұрған Еуропадағы зауыттарын қайта іске қоса бастады. Ресми мәлімдемеге сәйкес автомобиль құрастыру процесінің толық қалпына келуіне бірнеше күн қалды. Басылымдар хабарлағандай, 1 қыркүйектен бері, яғни JLR инфрақұрылымына хакерлер шабуыл жасаған күннен бастап бірде-бір машина конвейерден түспеген.

Қазір Вулверхэмптондағы қозғалтқыш құрастыратын зауыт пен Бирмингемдегі электрлі күштік құрылымға арналған электроника жасайтын алаң жұмысын қайта бастады. Солихаллдағы қалып өндіретін және көлік бояйтын цехтар жұмыс бастады. Компания конвейерін қалпына келтіргеннен кейін Словакиядағы Нитрада Defender мен Discovery модельдерін және Солихаллда Range Rover-ді шығара бастайды.

JLR өндірісті кезең-кезеңмен қайта жандандырып жатыр. Сондықтан бастапқыда көп автомобиль шықпайды, бірақ компания басшылары бұрынғы деңгейге тез ораламыз деп үміттеніп отыр.

Қыркүйектің басында хакерлер JLR-дің өндірістік және бөлшек сауда желісін істен шығарды. Бұл бренд қызметкерлеріне ғана емес, конвейерге бөлшек жеткізетін серіктес фирмаларға да әсер етті. Жағдай қиын болғаны сонша, марка үкіметтен көмек сұрауға мәжбүр болды. Мемлекет бұған дейін шамамен 1.5 миллиард фунт субсидия беріпті. Салдарынан марка шамамен 2 миллиард доллар жоғалтты. Компания дерегінше дилерлер әдеттегі сауда көлемінің төрттен біріне жетпеген.