Ioniq V электромобилінің сипаттамасы белгілі болды

Hyundai Қытайға арнап құрған суббрендінің алғашқы моделі — Ioniq V электрокарын биыл сәуірде Бейжің автосалонында таныстырған. Автомобиль Қытайда 2027 жылы саудаға шығады.

Көрмеде модельдің кейбір техникалық сипаттамасы, атап айтқанда ұзындығы 4.9 метр, дөңгелек базасы 2.9 метр екені жария болды. Енді Қытай Өнеркәсіп министрлігі таратқан мәліметтен күштік құрылымына қатысты деректі біліп отырмыз.

800 вольттық E-GMP архитектурасына негізделген Ioniq V бастапқыда бір ғана электромотормен жүреді. Standard-тағы қозғалтқыш — 190 ат күшін, қымбатырақ High Performance нұсқасындағысы 228 ат күшін береді. Құжатта аккумулятор сыйымдылығы жазылмаған, бірақ ол LFP батареясы (CATL өндірген) екенін білеміз, онымен машинаның жүріс қоры 600 шақырымға (CLTC циклі) жетеді.

Ioniq V — бренд ұсынған жаңа топтаманың алғашқы өнімі, алдағы бес жылда қатарға тағы 20 модель қосылады. Марка бұл машиналарды Қытайдың CATL, Momenta және Baidu сияқты компаниялармен бірге әзірлейді.