Автомобильге арналған мультимедиа жабдығын шығаратын Kazakhstan Mobility Engineering зауыты биыл 30 қазанда жұмыс бастады. Өнеркәсіп және құрылыс министрлігі хабарлағандай, қазақ тіліндегі интерфейсі бар мультимедианың алғашқы партиясы Hyundai Trans Kazakhstan зауытына жетті, оларды Tucson, Elantra және Palisade модельдеріне орнатады.
Ал 2025 жылдың екінші тоқсанында Алматыда қазақша интерфейсті таңдау мүмкіндігі бар мультимедиа жүйесін пайдаланатын AMMKZ мультибрендті автомобиль кәсіпорны іске қосылады.
Қазір машина ішіндегі дисплейде қазақ тілін таңдау мүмкіндігі қытайлық Chery-дің жаңа модельдерінде ғана бар.
Kazakhstan Mobility Engineering — «Астана Моторс» пен кореялық Motrex компаниясының бірлескен кәсіпорны. Зауыт жылына 100 мың дана өнім шығара алады. Жоба өндіріс локализациясын жақсартып, Қазақстан автоөнеркәсібін қолдауды мақсат етеді. Сондай-ақ Алматыдағы индустриалды аймақта автомобиль орындығы, резеңке және пластик бөлшектер шығаратын зауыт ашылады.
Комментариев: 0