Минскідегі «МотоВелоЗаводқа» барған Александр Лукашенко M1nsk мотоциклін өндіру барысында қандай отандық бөлшектер қолданатынын сұрады. Сөйтсе, көліктің дизайны мен идеясы және құрастыру процесіне ғана отандық мамандар атсалысады екен, ал бүкіл бөлшек Қытайда жасалған.
Бұл мемлекет басшысының шамына тигенін «Пул Первого» Telegram арнасында жарияланған видеодан көруге болады. «Бұлай көлік құрастырғаның мені де, халықты да ығыр етті. Өзіміз шығаруға тиіспіз. Ертең санкция салынса, өндіріс орны жабылып қалады», — деді Лукашенко.
Reformation басылымы мотоциклдің дизайнын да беларусьтер жасады деуге келмейді деп жазды. Өйткені ол қытайлық Shineray шығаратын Mash X-Ride 650 ретро-моделі. Бензин багындағы Mash жапсырмасының орнына жергілікті зауыттың логотипін іліп қойыпты. Бірақ дөңгелегіндегі алтын түстес қима мен қозғалтқыш қақпағындағы X-Ride 650 жапсырмасы модельдің түп төркінін аңғартады.
1945 жылы негізі қаланған «МотоВело» зауытының директоры бірден жұмыстан қуылды. Оның жолы болған сияқты, себебі кәсіпорынның алдыңғы иесі түрмеде отыр. Мемлекет басшысына бұл Шығыс Еуропадағы ең озық зауыт болады деп уәде берген ол 11 жылға сотталып, зауыт тәркіленген болатын.
Комментариев: 0