Гибрид Monjaro Қазақстанда қанша тұрады

Гибрид Monjaro Қазақстанда қанша тұрады

Кроссовердің алдыңғы және толық жетекті нұсқасы саудаға шығады.

Geely қыркүйектің басында Monjaro-ның экспортқа арналған, атауында EM-i қосымшасы бар гибрид нұсқасын таныстырған. Қарашаның ортасында Қазақстанда жаңа өнімге алдын ала тапсырыс қабылдай бастады. Біздің елде автомобильді Geely автосалондары емес, Geely Galaxy желісі сатады. Көліктерді Қостанайдағы Allur зауыты құрастырады. Бензоэлектрлі кроссовер көлік құралының типін мақұлдау құжатын тамызда алған.

GEA Evo платформасына негізделген Monjaro EM-i параллель гибридінің біздің елде Max және Ultra деп аталатын екі түрі саудаға түседі. Алғашқысы — алдыңғы жетекті. Оның күштік құрылымы 1.5 литрлік турбомотор, электромотор мен 3 сатылы редукторды біріктірген DHT блогынан және 18.4 кВт·сағ батареядан тұрады. Күштік құрылым жалпы 279 ат күшін береді, ал жүріс қоры — 1200 шақырым.

Ultra түрленімі толық жетекті. Артқы осіне 340 ат күшіне ие қосымша электромотор қойған. Бұл модельге сәл үлкен, 29.8 кВт батарея орнатылған. Бірақ жүріс қоры аздау — 1095 км.

Модельдің комплектациясы туралы толық ақпарат жоқ. Бірақ машинада үздік электрондық көмекшілер кешені мен қауіпсіздік жүйесі, CDC бейімді аспасы, креслоны жылыту және желдету, массаж функциясы, рөл мен бүйірлік айнаны жылыту жүйесі, 15,4 дюймдік дисплейі бар Flyme Auto медиажүйесі, проекция, цифрлық аспаптар панелі (12.3 дюйм), 16 динамикті аудиожүйе және басқа жабдықтар болатыны белгілі.

Бензоэлектрлі Monjaro EM-i кроссоверінің алдыңғы жетекті нұсқасының (Max) құны — 15 млн, толық жетекті түрленімнің (Ultra) бағасы 16 млн теңгеден басталады.

Пікірлер: 0

✖
Пікір қалдыру үшін тіркелу немесе кіру қажет.