Geely концерні Monjaro EM-i гибридін көрсетті

Компания Мысырда EM-i индексті Geely Monjaro-ның жаңа модификациясын таныстырды. Модель гибрид күштік құрылым және бұған дейін кроссовердің бензоэлектрлі нұсқаларында болмаған толық жетек жүйесін алды. Мұндай автомобиль Мексика, БАӘ және Қазақстанда саудаға шығады, кейін Еуропаға аттанады.

Кроссовердің сырт келбеті қарапайым Monjaro-ға ұқсайды. Бірақ CMA емес, GEA Evo платформасына негізделген. Гибрид қазір Қазақстанда сатылып жатқан модельден ірі. Ұзындығы 5 мм (4800 мм), биіктігі 11 мм (1700 мм) артқан.

Салоны айтарлықтай өзгерген. Жаңа ортаңғы консольде трансмиссия селекторы жоқ, оның орнын шайба басты. Айналасында климат жүйесін басқаратын панель және апаттық сигнал батырмасы тұр. Алдыңғы панельде қозғалтқышты іске қосатын батырма жоқ. Дисплейлер өзгермеді: 12.3 дюймдік цифрлық аспаптар панелі және 15.4 дюймдік медиажүйе. Экспортқа арналған көлікте үшінші экран болмайды.

1 / 7

• 
• 
• 
• 
• 
• 
• 

1 / 7

Monjaro EM-i 144 ат күшіне ие 1.5 литрлік турбомоторға негізделген қосылатын параллель гибрид құрылыммен жүреді. Қарапайым түрленімде ол 3 сатылы редукторы бар DHT гибрид блогына кіріккен бір электромотормен жұптаса жұмыс істейді. Үздік комплектация артқы дөңгелектерді айналдыратын қосымша электрлі агрегат алады. Жүйелердің жалпы қуаты 279 (544 Нм) және 340 ат күшіне (667 Нм) тең. Алдыңғы жетекті кроссовер 18.4 кВт·сағ аккумулятормен жабдықталады. Электр қуатымен 92 км еңсереді. Толық жетекті нұсқада 29.8 кВт·сағ батарея тұр, ол қуаттаусыз 130 шақырым жүріп өтеді.

Қазақстанда көліктің ресми тұсаукесері өтпеді. Бірақ марка модельге сертификат рәсімдеп, көлік құралының типін мақұлдау құжатын алды. Құжатта автомобиль Қостанайда жасалатыны жазылған. Оны Geely Galaxy дилерлік желісі сатуы мүмкін.