Гибрид Monjaro Қазақстанда сатылады

Қазақстан нарығына алғаш 2023 жылы аяқ басқан Geely Monjaro биыл тағы жаңарып, шілденің басында саудаға шыққан. Ал жақында Қазақстанға гибрид түрленімі келеді. Көлік құралының типін мақұлдау туралы жергілікті реестрде атауында EM-i қосымшасы бар Monjaro-ға қатысты құжат пайда болды. Онда Galaxy сөзі де бар, демек автомобильді Geely Galaxy дилерлік желісі ұсынады.

1 / 4

• 
• 
• 
• 

1 / 4

Құжатта машинаның ұзындығы 4800 мм екені жазылған, демек ол қазіргі Monjaro-дан (4795 мм) сәл үлкен. Бампері басқаша болуы мүмкін. Екі кроссовердің биіктігі де ұқсамайды: гибрид — 1700 мм, қазіргі бензинді нұсқа — 1689 мм.

Monjaro EM-i қосылатын параллель гибрид күштік құрылым алады. Яғни кроссовердің іштен жанатын қозғалтқыш әрі дөңгелекті айналдырады, әрі батареяны қуаттайды. Капот астында 144 ат күшіне ие (230 Нм) BHE15-MZF индексті 1.5 литрлік мотор тұр. Беріліс қорабының түрі мен электромотордың қуаты жайлы ақпарат жоқ.

Geely бұған дейін кей нарықта гибрид Monjaro-ны таныстырған. Алдыңғы жетекті көлікте турбомотормен бірге 136 ат күшін беретін DHT блогы жұмыс істейді. Электрлі схема 18.4 киловатт батареядан қуат алады, машина электр көмегімен 92 шақырым жүреді.

Құжатта толық жетекті Monjaro EM-i туралы да мәлімет бар. Қытайда мұндай кроссовер жоқ, шетел нарығына да шыға қоймады. Дегенмен жақында Филиппинде құрылымы осыған ұқсас автомобиль жайлы ақпарат тараған. Сол елдің энергетика министрлігі жариялаған мәліметке сүйенсек, 3DHT гибрид блогы мен артқы осьтегі электромотор бірге 272 ат күшін береді. Мұндай машинаның батареясы — 29.8 киловатт, жүріс қоры — 130 шақырым.

Monjaro EM-i Қазақстанға қашан келетіні белгісіз.

Елдегі автосалондарда сатылып жатқан Geely Monjaro жайлы толық ақпаратты Kolesa.kz-тегі «Жаңа көліктер» бөлімінен көруге болады. Онда модельдің техникалық сипаттамасы, комплектациясы және бағасы толық жазылған.