Германияда ғалымдар көліктің алдына стоп-сигнал орнатуды ұсынды

Грац техникалық университетінің ғалымдары мен Бонн институтының инженерлері автомобильдің алдыңғы бөлігінде тұратын стоп-сигналдың тиімділігін зерттеген жұмысын жариялады. Мамандар мұндай қосымша шам жол апатының санын азайтуы мүмкін деген қорытындыға келді.

Зерттеушілердің пікірінше мұндай технология қиылыста жүргізушілерге өзара хабар беруге көмектеседі. Мысалы, жолда басымдыққа ие жүргізуші қосымша жарықтың арқасында қарсы машина жол беріп жатқанын көре алады.

Қосымша шам жаяу жүргіншілер жолдан өтер кезде де көмектеседі. Яғни, көлік тоқтап жатқанын анық көруге болады.

Ғалымдардың есептеуінше машинаның алдыңғы бөлігіне орнатылған стоп-сигнал қиылыста болатын апат санын 17–26 % азайтады. Өзге апаттардың салдары шамамен 40 % жеңіл болар еді. Зерттеу бұның электронды жедел тежеу жүйесінен тиімді екенін көрсетті.

CarBuzz басылымы хабарлағандай, зерттеушілер Германия мен Словакия елдерінде сауалнама жүргізіпті, оған 3 мыңнан астам жүргізуші қатысқан. Олардың төрттен үші алдыңғы тежеуіш шамын енгізу идеясын қолдаған. Бірақ қазір бұл бастаманы ешкім қолға алмады.