Geely-дің автомобильдері Ford-пен ынтымақтастық арқасында Еуропаға шығуы ықтимал. Reuters агенттігі хабарлағандай, компаниялар бірнеше айдан бері Қытай модельдерін қарт құрлықтағы Ford зауыттарының бірінде құрастыру туралы келіссөз жүргізіп жатыр.
Қазір Еуропада Ford-тың үш кәсіпорны бар. Олар Германия мен Испанияда орналасқан. Концерн солардың бірінде Geely топтамасын конвейерге қойса, ЕО-ның жоғары баж салығын айналып өтеді.
Ford өндірістік қуатын пайдалануға рұқсат берсе, Geely-дің озық технологияларын, соның ішінде автономды басқару жүйесін алады деген болжам бар.
Geely бұл туралы түсініктеме беруден бас тартты. Ford өкілдері әлемдегі түрлі компаниялармен келіссөз жүргізіп жатқанын, бірақ бәрі бірдей нәтиже бермейтінін атап өтті.
Geely еуропалық брендтің өндірістік қуатын пайдалануды ойлап жүрген жалғыз Қытай автөндірушісі емес. Аспан асты еліндегі басылымдардың мәліметінше Jaguar Land Rover мен Chery де осыған ұқсас келісім жасамақшы.
Комментариев: 0