Электромобиль саудасы Еуропада артып, АҚШ-та құлдырап барады

Жанармай қымбаттап, бөтен көліктің бензин багын тесіп, отын ұрлау фактісі көбейіп жатқанына қарамастан, АҚШ-та дәстүрлі мотормен жүретін машинаға сұраныс артып, электромобиль алғысы келетіндер азайып барады.

CarEdge дерегіне сүйенсек, Америкада биыл бірінші тоқсандағы электромобиль саудасы 2025 жылмен салыстырғанда 27 % төмендеп, 216 399-ға түскен. Бұған былтыр қыркүйектен бастап 7500 доллар көлеміндегі салық жеңілдігі күшін жойғаны әсер еткені анық.

Сырттан келетін мұнай мен газға тәуелді Еуропада жағдай керісінше. Жанармай құнының өсуіне байланысты тұрғындар электрокарды бұрынғыдан көбірек таңдай бастаған.

Еуроодақта наурызда 224 мыңнан аса электромобиль тіркелген, бұл — жаңа автомобиль саудасының 22 %-ы. Ал 2025 жылдың бірінші тоқсанында жарты миллионнан аса электромобиль өтті, бұл көрсеткіш бір жыл бұрынғыдан 33.5 % көп, деп жазды Carscoops.

Мұндай жағдай автоконцерндердің жұмысын қиындатып отыр. Олар клиенттің сұранысына бейімделу үшін электромобильге толығымен көшу жоспарынан бас тартып, бұрын конвейерден алып тастаған модельдерін топтамаға қайта қосып жатыр.