PwC (PricewaterhouseCoopers) ұйымы жүргізген зерттеуге сенсек, Қытай әлемдік электрлі көлік нарығында аса маңызды орынға шықты. 2022 жылдың III тоқсанында аспан асты елінде бір жарым миллион батареялы машина өтті, бұл былтырғы көрсеткіштен екі есе көп.
PwC есебінше аталған мезгілде әлемдегі барлық электромобильдің 73 %-ы Қытайда сатылыпты. Бірақ мұның бәрі қытайлық марка көліктері емес, Tesla және VW сияқты батыс компанияларымен бірлескен кәсіпорында шыққан өнімдер де бар.
Өз елінде керемет көрсеткішке жеткен Made in China машиналары енді Еуроодақ нарығын жаулайды деген болжам бар. PwC биыл Еуропада шамамен 200 000 Қытай көлігі өтетінін есептеді, оның 90 мыңы толық электрлі, 40 мыңы гибрид, ал қалғаны іштен жанатын қозғалтқышы бар машина. 2025 жылға қарай олардың саны 800 000 данаға жетуі мүмкін. Егер бұл үрдіс жалғаса берсе, онжылдықтың соңында Еуропа автомобиль экспорттаушы емес, импорттаушыға айналуы мүмкін, деген болжам жасады Automotive News Europe.
Сала мамандары Еуропа автоөндірушілері бөлшек тапшылығынан зардап шегіп жатқанда, мұндай мәселеге аз ұшыраған Қытай компаниялары нарықтағы жағдайды тиімді пайдалануға күш салып жатқанын айтады, олар инновациялық технологияны көптеп енгізумен қатар бағаны қолжетімді деңгейде ұстап отыр.
Комментариев: 0