Еуропада машина қоятын орын қалмауы мүмкін

Еуропадағы елуге жуық экологиялық ұйымды біріктіретін, Еуроодақтың заңнамасына әсер ету үшін сараптама орталығы және лоббистік топ ретінде жұмыс істейтін Transport & Environment (T&E) ұйымы Еуропада көліктің өлшемін жылдан-жылға ұлғайту үрдісін тоқтатуға шақырып отыр.

T&E дерегінше кейінгі 25 жылда қарт құрлықта сатылған жаңа машиналардың ұзындығы жыл сайын орта есеппен 1.2 см, биіктігі 0.5 см артып келеді. Бұған биік капот та кіреді. Сарапшылардың айтуынша бұл жолдағы өлім-жітімнің көбеюіне себеп болып отыр. Мұны New York Times (NYT) газеті жүргізген зерттеу растады.

Сарапшылар 2040 жылға қарай Еуропадағы автомобильдің орташа ұзындығы 4.56 метр, ені 1.9 метрге жетеді деп болжады. 2000 жылы көрсеткіш 4.09 және 1.69 метр еді. Бұлай жалғаса берсе, тұрақтардың 8.5–14 %-ы жойылуы мүмкін. Мысалы, Лондон немесе Берлинде 100 мыңдай машинаға орын жетпей қалады.

Ірі көлік ауыр болғандықтан көбірек энергия (бензин немесе электр қуаты) тұтынады. Бұл мұнай импортына тәуелділікті арттыруы ықтимал немесе 2040 жылға қарай жыл сайын қосымша 22.5 тераватт-сағат электр энергиясын өндіру қажет болады.

T&E тек автоөндірушілер мен көлік иелеріне үміт артпай, машинаның өлшемін заңмен реттеп, енін 192 см, капот биіктігін 85 см-ден асырмауды ұсынды. Ұйым автомобильдің өлшеміне қарай салық салып, тұрақ ақысын да соған сай есептеу қажет және ұзындығы 4.2 метрден аспайтын ықшам электромобильге жеңілдік беру керек деп санайды.

Халық мұндай ұсынысқа қарсы. Олар жоғары тарифті сән-салтанат салығы деп, мегаполистен алыс тұратын азаматтарды алалау ретінде қабылдады.