EuroNCAP бес Қытай моделін сынақтан өткізді

Еуропаның автомобиль қауіпсіздігін зерттеу ассоциациясы (EuroNCAP) кезекті краш-тест сессиясының нәтижесін жариялады. Бұл жолы ЕО нарығына аяқ басқан Қытай кроссоверлері таңдалған. Электрокарлар мен гибридтер бес жұлдызды баға алды. Бірақ мамандар Қытай компаниялары сапаға назар аударғаны жөн деп санайды.

Ірі Polestar 3 электрокары бетпе-бет және бүйірлік соққыдан баланы қорғау сынағында 93 % ұпайға ие болып, мамандарды таңғалдырды. EuroNCAP бұл кейінгі тоғыз жылдағы ең жоғары көрсеткіш екенін айтты. Кроссовер алдыңғы жолаушының қауіпсіздігін тексергенде 90 % нәтиже көрсетті.

BYD Sealion 7-нің балаларды қорғау деңгейі Polestar 3-пен бірдей, бірақ ересек жолаушы мен жаяу жүргінші үшін қауіпсіз екенін дәлелдей алмады. Geely EX5 бес жұлдыз алғанымен, баланы қорғау жүйесінен ақау табылып, бетпе-бет соғылған кезде шанақтың алдыңғы тірегі бүлінгені байқалды.

Hongqi E-HS9-да жүргізуші эйрбэгі аздап жыртылған, алдыңғы жолаушының басын қорғау деңгейі де сынға ұшырады. Hongqi қауіпсіздік жастығындағы ақаудың себебін анықтап, жөндедік деп мәлімдеді. Бренд машинаны құрастырған зауыт пен жеткізушіні де тексереді.

Jaecoo 7 гибриді де бес жұлдыз алды. Бірақ краш-тестке қатысқан көліктегі қауіпсіздік пердесінің артқы бөлігі дұрыс ашылмаған. Автоөндіруші кемшілікті түзеуге уәде берді.

«Қытай маркалары жаңа модельдерді өте жылдам шығарып жатыр, олардың көбі EuroNCAP сынағында ең жоғарғы бес жұлдызға ие болды. Бірақ табылған ақаулар өндірісте проблема бар екенін көрсетті, егер компаниялар Еуропадағы қауіпсіздік стандартын сақтағысы келсе, оны елеусіз қалдырмағаны жөн», — деді EuroNCAP бас хатшысы Михель ван Ратинген.

Модель	Жалпы рейтинг	Ересек жолаушыны қорғауы	Баланы қорғауы	Жаяу жүргіншіні қорғауы	Қауіпсіздік жүйелері
BYD Sealion 7		87 %	93 %	76 %	79 %
Geely EX5		86 %	87 %	83 %	83 %
Hongqi E-HS9		82 %	87 %	73 %	82 %
Jaecoo 7		81 %	80 %	80 %	80 %
Polestar 3		90 %	93 %	79 %	83 %