Ескі Toyota моторымен жүретін Koenigsegg гиперкары

NHET TV YouTube-арнасы Attack нұсқасындағы Koenigsegg Jesko гиперкарының көшірмесі туралы ролик жариялады. Түпнұсқаның бағасы 3 млн доллардан басталады, бірақ блогерлер донор агрегатты небәрі 100 долларға алған. Реплика белгілі себептермен жалпы жолға шыға алмайды.

Гиперкардың вьетнамдық нұсқасы бөтен платформаға негізделмеген, шеберлер оған арнайы тәуелсіз аспасы бар рама жасаған. Оның құрылымы әдеттегі Jesko сұлбасына негізделіпті. Соған сай шанақ пропорциясын сақтап қалды, егер өзге шасси болса, оны сақтау мүмкін емес еді.

Шыны талшықты шанақ панелін жасау үшін шеберлер гиперкардың толық өлшемді саз макетін дайындады. Түпнұсқаға барынша ұқсайтын арнайы жарық техникасын жасады. Купенің есігі әдеттегі Koenigsegg сияқты алға және жоғары қарай ашылады. Интерьер архитектурасы да түпнұсқаға біршама ұқсайды, бірақ оның элементтері арзан пластиктен жасалған әрі дисплейі жалған сияқты көрінеді.

Koenigsegg-тің бес литрлік V8 моторы 1500 ат күшін береді. Бірақ репликаның қуаты бұдан әлдеқайда төмен. Машина ескі Toyota Carina E-нің 100 доллар тұратын 1.8 литрлік атмосфералы моторымен жүреді. Беріліс қорабы мен негізгі компоненттерін де осы көліктен алған. Блогерлер оны өздері ойлап тапқан арнайы ливреямен сәндеді.