Жобаны Ішкі істер министрлігі әзірледі, оның негізгі мақсаты — халықтың қоғамдық тәртіпті сақтауға белсене қатысуына ықпал ету. Бұл іске тіркелген де, тіркелмеген де көмекшілер атсалыса алады.
Құжатқа сәйкес азаматтар құқық бұзу туралы өз еркімен ескертіп, оның алдын алуға, басқалардан қоғамдық тәртіпті сақтауын талап етуге, полицияға ереже бұзу фактісі және заң бұзуға бейім тұлғалар туралы хабар беруге, ереже бұзылғанын жазып алу үшін техникалық құралдар пайдалануға, заңсыз қол сұғу салдарынан және жол апатынан зардап шеккендерге көмектесуге құқылы.
Жауапты орган ынталандыру үшін мынадай шаралар қолдануға дайын:
- алғыс айту;
- мақтау қағазын беру;
- ақшалай сыйақы беру;
- білім алу және біліктілікті арттыру курстары;
- ұйымдарға, мекемелерге ынталандыру жөнінде ұсыныс жолдау;
- құқық бұзудың алдын алуға елеулі үлес қосқаны үшін тұлғаларды марапаттау және құрметті атақ беру туралы ұсыныс жолдау.
Полицияға әкімшілік құқық бұзылғанын растайтын хабарлама (фото және бейнежазба қосып) жіберген кісі Қазақстан Республикасының заңнамасына сәйкес жергілікті атқарушы органның шешімімен ереже бұзған адам төлеген айыппұлдың бір бөлігін сыйақы түрінде беру арқылы ынталандырылуы мүмкін«. Көмекшілер алушы ретінде қайырымдылық қорын көрсетуге құқылы.
Заң жобасын мәжіліс талқылап жатыр, депутаттар каникулға кетпей тұрып, яғни маусымның аяғына дейін шешім қабылдауға тиіс. Күзде құжатты сенат қарайды, содан соң ол президентке жол тартады. Заң қабылданса, әкімдіктер сыйақы беру ережесін бекітеді.
Ақша үшін ереже бұзғандар туралы мәлімет беруге дайынсыз ба?
Комментариев: 0