Биыл 1 қыркүйекте қоғамдық жұмысқа тарту жазасы қолданысқа енді. Әкімшілік кодекске енген түзетулерге сәйкес жедел жәрдем немесе полиция көлігіне бір жылда екінші мәрте жол бермеген жүргізуші 40 АЕК айыппұл орнына 20 сағат көше сыпырады. Бір жыл ішінде қайта ереже бұзып, апатқа себеп болған жаяу жүргінші мен самокатшыға да дәл осындай шара қолданылады.
14 қазанда осындай жаза түріне тартылған адамның қоғамдық жұмысты атқару ережесіне қатысты өзгерістер күшіне енді. Енді жол ережесін бұзғандар «Қоғамға қарызды қайтару» — «Отдать долг обществу» деген жазуы бар арнайы жилет киіп, қоғамдық жұмысқа шығады.
Қоғамдық жұмысқа тартылғандар не істейді
Әр өңірде қоғамдық жұмыстардың жеке тізімі бар, бірақ бір-біріне ұқсайды. Мысалы, Алматыда жазасын өтеушілер мынадай қызмет атқарады:
| Қоғамдық жұмыс түрі | Мерзімі | Толық сипаттамасы |
| Жолды күтіп ұстау | Жыл бойы | Қоқыс тиеп, оны арнайы орынға төгу, жол жиегіндегі шөпті ору және шабылған шөпті жинау, жол бөлігін тазалау және жуу, шұңқырды бітеу, жарылған, ойылған және шөккен жолды жөндеу, су ағатын арықты қардан тазарту, жол таңбасын салу, тротуар тазалау |
| Қыста жолды күтіп ұстау | Қыс | Көктайғаққа қарсы материалдар дайындау, жолды қардан тазарту, қар басқан жерді ашу, жүріс бөлігіндегі қарды тегістеу, үйілген қарды шығару, жол бөлігіне көктайғаққа қарсы материалдар төгу, автобус аялдамасын қар мен мұздан тұрақты түрде тазарту |
| Жолдар мен жолайрықтарды көгалдандыру | Көктем – жаз – күз | Өндірістік база, гүлзар және жолайрықтағы көгалдағы өсімдіктерді күтіп ұстау, гүл егу, қалпына келтіру және безендіру |
| Қала аумағын тазалау | Жыл бойы | Қоғамдық көлік аялдамасын, тротуар мен арықты тазалау |
| Бағдаршамды таза ұстау | Жыл бойы | Бағдаршам объектілерін таза ұстау |
Арнайы жилетті әкімдік береді, оны киген адам қызметі үшін ақы алмайды. Тұрақты жұмысы бар немесе оқитындар күніне 4 сағаттан артық жұмыс істемейді, ал жұмыссыздар күніне 8 сағатқа дейін еңбек етеді, бірақ аптасына 40 сағаттан аспауға тиіс.
Комментариев: 0