Биыл 1 қыркүйектен бастап жаңа жаза түрі — қоғамдық жұмысқа тарту қолданысқа енді. Қазір жедел жәрдем немесе полиция көлігіне бір жылда екінші мәрте жол бермегені үшін тағайындалған 40 АЕК айыппұлды 20 сағат қоғамдық жұмысқа ауыстыруға болады. Ереже бұзып, апатқа себеп болған жаяу жүргінші, самокатшы сияқты жол қозғалысына қатысушылар бір жыл ішінде осы әрекетін қайталаса, балама жаза ретінде 20 сағат көше тазалайды.
ІІМ бұл жазаны орындау тәртібіне өзгеріс енгізеді. Жол ережесін бұзғандар 14 қазаннан бастап (өзгеріс күшіне енетін күн) «Қоғамға қарызды қайтару» — «Отдать долг обществу» деген жазуы бар арнайы жилет киіп, көше сыпырады.
Ережеге сәйкес жергілікті атқарушы орган, яғни әкімдік:
- Арнайы біліктілікті қажет етпейтін қоғамға пайдалы тегін жұмыстың түрін және қауіпсіздігін ескере отырып, жауапқа тартылған адамның тұрғылықты жеріне жақын орналасқан қоғамдық орындағы объектіні таңдайды.
- Жауапқа тартылған адамның деректері, қоғамдық жұмыс түрі, объектісі, орындау шарттары, жауапты ұйым, жұмыс уақытының ұзақтығы (күніне 4 сағаттан аспайды) көрсетілетін бұйрық шығарады. Тұрақты жұмысы жоқ не оқу орнында оқымайтындар күніне 8 сағат қызмет етеді, бірақ аптасына 40 сағаттан аспауы, демалыс уақыты белгіленуі керек.
- Жилет, құрал-жабдықтар және басқа еңбек құралдарын береді.
- Айдың соңғы жұмыс күнінен кешіктірмей пробация қызметіне атқарылған жұмыс уақытын есепке алу табелін және орындалған жұмыс актісін, ереже бұзған азаматтың тәртібі туралы ақпаратты жолдайды.
- Ереже бұзушы жазасын орындаудан жалтарса, пробация қызметіне хабарлайды.
Комментариев: 0