ЕО мен Қытай баж салығын төмендетуі мүмкін

Брюссель мен Бейжің Қытайдан ЕО-ға кіретін электрокарларға арналған баж салығын қайта қарайды. Reuters хабарлағандай, мұны ЕО сауда комиссиясы мен Қытайдың тиісті министрлігі растаған. Келіссөз нәтижесінде жағдай біршама оңалуы ықтимал.

2024 жылы Еуроодақ Қытай электрокарларына жоғары импорт салығын енгізді, салық мөлшері автоөндіруші қызметіне Бейжің билігі қаншалықты араласатынына байланысты болып, 45 %-ға жетті. Бұл шара Еуропаның батареялы көліктерін демпингтен қорғауға арналған. ЕО билігі Қытай өндірушілері мемлекет қолдауына сүйенеді деп санайды.

Тараптар жаңа келіссөз барысында Қытайдан кіретін электрокарларға ең төменгі баға шегін белгілеу мүмкіндігін қарастырады. ЕО сауда комиссары мен Қытай үкіметінің өкілі осыны талқылауға келісіп отыр. Тариф саясатының өзгеруі Еуропаға Қытайдан кіретін батареялы машина құнының түсуіне әсер етеді. Германия автоөндірушілер ассоциациясы бұл қадамды қолдап, кеден салығын енгізу қате шешім болғанын айтты.

Бұған Дональд Трамп бастаған АҚШ пен Қытай арасындағы сауда соғысы себеп болды. АҚШ Қытайдан жеткен барлық тауарға баж салығын 145 %-ға дейін көтерді. Бейжің бұған жауап ретінде 84 % салық енгізген. Трамп Қытайдан өзге елдерге баж салығын салуды 90 күнге кідіртті. Қытай сауда ағынын АҚШ-тан Еуропаға бұруды көздеп отырған сияқты.