Дональд Трамп электрокарға көшу стратегиясынан бас тартты

АҚШ-тың жаңа президенті Дональд Трамп инаугурациядан кейін бірнеше жарлыққа қол қойды. Reuters хабарлағандай, олардың бір бөлігі АҚШ автокөлік өнеркәсібін дамыту стратегиясына қатысты. Трамп бұрынғы президент Джо Байденнің электромобильге көшу жоспарынан ресми түрде бас тартып, қуаттау станциясына бөлінген субсидияны қысқартты. Automotive News деректеріне сәйкес, президент жаңа импорт салығын енгізбекші.

Президент Байденнің 2030 жылға қарай АҚШ-та электрлі көлік саудасының үлесі 50 %-ға жетуге тиіс деген 2021 жылғы қаулысының күшін жойды. Ол федералдық агенттіктерге жаңа қуаттау станцияларын салуға бөлінген қаражатты пайдалануға тыйым салды. Бұған 5-7.5 миллиард доллар қаражат бөлінген, бірақ мердігерлер нақты қанша ақша алғаны нақтыланбады.

Трамп әкімшілігі электрокар сатып алуға берілетін 7.5 мың доллар жеңілдікті алып тастау және жаңа экологиялық стандарттың талаптарын жеңілдету мәселесін талқылап жатыр. Президент талапты қатаңдатудың орнына 2019 жылғы стандартқа оралуды ұсынды. Ол электромобильді мәжбүрлі түрде нарыққа енгізу дұрыс емес деп, отандық өндірушілерді қорғау үшін шаралар қабылдамақшы.

Мексика мен Канададан кіретін машинаға 25 % баж салығын енгізу жоспарланып отыр. Бұл салық 1 ақпаннан бастап күшіне енуі мүмкін. Трамптың жоспары неміс компаниялары арасында дүрбелең туғызды. Әсіресе Volkswagen-ді алаңдатып қойды. Жылына 350 мың автомобиль құрастыратын Мексикадағы Пуэбла зауыты үшін Америка негізгі нарық саналады. Volkswagen жаңа баж салығы бизнесті тиімсіз етеді деп мәлімдеді. Неміс автоөндірушілер қауымдастығы (VDA) бұл шара көліктің қымбаттауына және инфляцияның өсуіне әкелетінін айтты.

Бейресми деректерге сүйенсек, Stellantis концернінің басшысы Джон Элканн бұл мәселе бойынша Трамппен бірнеше рет кездескен. АҚШ-та Stellantis саудасының 40 %-ын импортталатын машиналар құрайды.

Сарапшылардың мәліметінше Volkswagen жаңа электрокарларын жаһандық нарыққа шығарудан бас тартты. Барлық жоспар, соның ішінде сатылып жатқан көліктердің рестайлинг нұсқасын жасау келер жылға шегерілді. Land Rover электрлі Defender өндірісін кейінге қалдырды. Қолданыстағы платформа сыйымдылығы жоғары батарея орнатуға мүмкіндік бермегендіктен, жол талғамайтын көлік жаңа буынға өткеннен кейін ғана электромобильге айналады.