Елімізде жанармайдың шекті бағасы белгіленді

5 қаңтарда Қазақстан билігі әлеуметтік-экономикалық жағдайды тұрақтандыру шарасы аясында жанармай бағасын реттеуді уақытша қайта қолға алу туралы шешім қабылдады.

Алдағы 180 күнде жанармай құю бекеттерінде АИ-92 бензинінің литрі 182 теңгеден, АИ-95 бензині 215 теңгеден сатылуы керек. Маусымаралық және жазғы дизель екі түрлі бағада сатылады: литріне 230 және 260 теңге. Бірінші баға Нұр-Сұлтан, Алматы, Шымкент қалалары және Алматы, Атырау, Жамбыл, Қарағанды, Қызылорда, Павлодар және Түркістан облыстарында, ал екіншісі Ақмола, Ақтөбе, Шығыс Қазақстан, Батыс Қазақстан, Қостанай және Солтүстік Қазақстан облыстарында қолданылады.

Сондай-ақ сұйытылған газ бағасы да бекітілді:

• Ақтөбе, Атырау, Маңғыстау облыстарында — 50–55 теңге;
• Шымкент қаласы, Шығыс Қазақстан, Жамбыл, Батыс Қазақстан, Қызылорда және Түркістан облыстарында — 60–65 теңге;
• Алматыда — 65 теңге;
• Нұр-Сұлтан, Ақмола, Алматы, Қостанай, Қарағанды, Павлодар, Солтүстік Қазақстан облыстарында — 70–75 теңге.

Айта кетейік, былтыр жыл соңына қарай кейбір өңірде автогаз бағасы 130 теңгеге жеткен еді.

Газ сататын 180 компанияға қатысты баға белгілеуде алдын ала сөз байласты деген күдікпен тергеу басталды. Тергеудің алғашқы қорытындысы 20 күн ішінде белгілі болады.