Бірнеше жыл бұрын электросамокат сынды құралдар көзге сирек түсетін, ал қазір мобильді құрал мінгендерді қаланың әр бұрышынан кездестіруге болады.
Алайда көліктің осы түрін тізгіндегендер көбейгенмен, олардың статусы әлі айқындалған жоқ. Шенділер оны көліктің қай түріне жатқызатынын да білмейді. Бастапқыда мопедке теңестіріп еді, кейін маусымда ІІМ басшысы Ерлан Тұрғымбаев самокат жол қозғалысына қатысатын құрал емес деп мәлімдеді.
Микромобильді көлікке құқықтық түсінік беріп, оның әрі қарай қалай дамитынын айқындау мәселесінің елде өзекті болғаны сонша, енді істі бизнес өкілдері өз қолына алмақ. Jet, Ozim және Eleven кикшеринг операторлары Экологиялық көлік қауымдастығын құрды, олар жасыл техниканы қолдану ережесін әзірлеуге қатысуға ниетті.
Ассоциация ең алдымен жол ережесі мен жол жүрісі туралы заңға түзету енгізуді қалайды. Кәсіпкерлер құжатқа «жеке мобильділік құралдары» деген түсінік енгізуді көздейді. Бұл қатарға электросамокаттан бөлек монодөңгелек пен сигвей де қосылады. Сонымен қатар мобильді құралдың салмағы 35-40 келіден, максимал жылдамдығы 25 км/сағ шегінен аспауы қажет.
Құқық мәселесіне келер болсақ, ассоциация аталған құралдарды велосипедпен теңестіруге үміттеніп отыр. Яғни, электросамокат мінгендер веложолақпен, ол болмаса, жүргін бөліктің оң жақ шетімен немесе жаяу жүргіншілерге қауіп төндірмей, тротуар арқылы қозғала алады.
Кәсіпкерлердің екінші мақсаты — елге электрлі самокат кіргізу процесін жеңілдету. Олардың ойынша бұл мәселе кедендік салық мөлшерін азайту не оны алып тастау арқылы шешіледі. Қазір бұл көлікті жеткізушілер 14 % және ҚҚС (12 %) ақша төлейді.
Сонымен қатар экологиялық көлік қолдануды насихаттау және оны жүргізу мәдениетін арттыру жоспарда бар. Осы мақсатта қазір де біраз жұмыс жүргізілуде. 25 қараша күні Алматыда өткен талқылауда жалға алу сервисіне тіркелер алдында тұрғынның жол ережесін білетінін тексеру үшін мини-тест өткізу сияқты бірнеше қызық идея айтылды.
Бизнес өкілдерінің бастамасы орынды екенін айта кеткен жөн. Алайда электросамокат иелерінің ереже сақтап жүргенін қадағалау қажеттігін де ұмытпау керек. Қазір полиция самокат, мопед рөліндегілерді бақылауда ұстап отырған жоқ. Әсіресе, мопед мінгендер тротуар мен жаяу жүргіншілер өткелінде жүйткіп, жұртқа қауіп төндіруде. Біздің ойымызша бұл тездетіп шешуді қажет ететін тағы бір мәселе.
Комментариев: 0