Қос дөңгелекті Honda көліктерінің қатары сирейді. Бұған Жапонияда мопедтерге қатысты экологиялық талаптардың қатаңдауы себеп болған.
Көлемі 50 кубтан аспайтын моторға арналған катализаторлы нейтрализатор шығарып, орнату көліктің екі мың долларға қымбаттауына әкеледі, салдарынан бағасы 125 кубтық агрегаты бар мопедке теңеседі.
Келер жылы мамырда аңызға айналған Super Cub пен оның Cross Cub нұсқасы, Benly скутері және мотокросқа аранлған CRF50F балалар мотоциклі тарих қойнауына кетеді.
Nikkei Asia таратқан ақпаратқа сүйенсек, Жапонияда 50 кубтық мопед алатындар едәуір азайған, өйткені көп адам электр көмегімен жүретін техника таңдайды. Мәселен, былтыр небәрі 92 824 бензинді мопед өтіпті. Басылым мұндай техника 1982 жылы аса танымал болғанын атап өтті, сол кезде 2.8 млн мопед сатылыпты. Қазір де 50 кубтық моторы бар мототехника нарығының 80 %-ын Honda өнімдері құрайды.
Комментариев: 0