Мәжіліс депутаттары электросамокатқа қатысты тағы бір заң жобасын* талқылап жатыр. Құжат авторлары «Жол қозғалысы туралы» заңнан электросамокаттың «жаяу жүргіншілерге қауіп төндірмей, тротуар немесе жаяу жүргіншілер жолымен 6 км/сағ-тан аспайтын жылдамдықпен жүруіне болады» деген тармақты алып тастауды ұсынды. Мұның басты себебі — жаяу жүргіншілердің қауіпсіздігі.
Тәжірибе көрсеткендей, тротуарда 6 км/сағ жылдамдықты ешкім сақтай бермейді. Өйткені баяу жүргенде тепе-теңдік сақтау өте қиын.
Егер ережеге өзгеріс енсе, электросамокатпен жолдың жүргін бөлігінің оң жақ шетімен немесе веложолақпен ғана қозғалуға болады. Жол ережесіне сәйкес жасы 18-ге толған, кез келген санаттағы жүргізуші куәлігі бар азамат қана жол бойында самокат жүргізе алады.
Ал веложол және тротуар бойымен велосипедші мен өзге де жеке мобильділік құралын мінген адам жүре алады.
ҚР ІІМ электросамокатты тіркеу ережесін дайындап жатыр. Самокатқа бір әріп пен бес цифрдан тұратын қара нөмір тағылады деген ақпарат бар, нөмірді раманың артқы және бүйір бетіне орнатады. Бірақ мұның бәрі қазірше жоба ғана.
Былтыр күзде президент жолдағы қауіпсіздік мәселесі өзекті екенін, соның ішінде самокатшылар қатысқан апат көбейгенін айтқан.
«Электросамокатқа да назар аудару қажет, бұл тақырыпты қоғам қызу талқылап жатыр. Екі жыл бұрын жаяу жүргіншілер жолымен жүруге шектеу қоятын заңнама күшіне енді. Бірақ қоғамдық орындарда жағдай онша өзгерген жоқ, азаматтарға әлі де қауіп төніп тұр. Қазір осы саланы реттейтін заңнама әзірленді, соны тез арада қабылдау қажет», — деді мемлекет басшысы.
* «Жол қауіпсіздігін цифрландыру және жүргізушілерді даярлау саласындағы кәсіпкерлік қызмет мәселесі бойынша ҚР кейбір заңнамалық актілеріне өзгеріс пен толықтыру енгізу туралы».
Комментариев: 0