Бүгін халыққа жолдауында Қасым-Жомарт Тоқаев жолдағы қауіпсіздік мәселесін көтерді.
«Жұмыс жүріп жатыр, әрине. Бірақ көлік апаты азаймай тұр. Жыл басынан бері 22 мыңнан аса апат тіркелген. Көп нәрсе жүргізушілерге байланысты екені анық, себебі ереже бұзатындар аз емес.
Әр адам өз өмірі мен айналасындағы жандардың қауіпсіздігі үшін жауапты екенін түсінуге тиіс. Бүкіл қоғам болып көлік жүргізу мәдениетін қалыптастыруымыз қажет.
Электрсамокатқа да назар аударған жөн, мұны халық қызу талқылап жатыр. Екі жыл бұрын заңнамаға жаяу жүргінші жолымен қозғалуға тыйым салатын ереже енген. Алайда қоғамдық орындарда жағдай өзгерген жоқ, халық әлі де қауіпке тап болуы ықтимал.
Осы саланы реттейтін нормалар дайын, енді оларды тездетіп заңнамаға енгізу керек. Әр азаматтың, әр баланың өмірі бағалы және мұнда ұсақ-түйек деген болмайды. Оның үстіне, мұның бәрі қауіпсіз Қазақстанды құру жолындағы маңызды қадамдар», — деп мәлімдеді президент.
Біраз уақыт бұрын сақтандырушылар елдегі шынайы апат санын жария еткен, ол ресми статистикадағыдан әлдеқайда көп.
ҚР ІІМ Әкімшілік полиция басшысы Қайсар Сұлтанбаев ретсіз тұрған, тротуарда жылдамдығы шектелмеген самокат үшін кикшеринг компанияларды жауапқа тартамыз деп уәде берді.
Комментариев: 0