Биыл елден Ресейге қанша автомобиль кетті

2022 жылдан бастап әлемдік автоөндірушілердің көбі Ресейге жаңа көлік жеткізуді ресми тоқтатқаннан кейін мұндағы халықтың бір бөлігі жаһанды жаулай бастаған Қытай маркаларына бет бұрса, басқалары басқа елдерден автомобиль алуға көшті. Ресейге жаңа машина Қазақстаннан да барып жатыр.

Желідегі жергілікті тұрғындардың шағымынан көрші мемлектке машиналар көптеп сатылып жатқандай көрінеді. 2024 жыл Қазақстан автонарығы үшін рекордтық көрсеткіштермен есте қалды, биыл нәтиже өзгеруі мүмкін. Дегенмен теріскейге шынымен көп көлік кетіп жатыр ма?

«Автостат» басшысы Сергей Целиковтың мәліметінше алғашқы бес ай қорытындысы бойынша Қазақстаннан Ресейге 2369 жаңа автомобиль экспортталған. Бұл 2024 жылдың сәйкес кезеңімен салыстырғанда 73 % (8776 дана) аз. Жүрген автомобильге сұраныс төмен, небәрі 256 машина немесе 29 %.

Целиков экспорттың шарықтау шегі 2023 жылға сәйкес келеді деді, сол кезде 44.7 мың жаңа және 2.2 мың жүрген машина Қазақстан шекарасын асқан. Былтыр 29.2 мың жаңа және 764 ескі көлікке дейін қысқарды.

Ресейде ең танымал маркалар — Kia мен Hyundai. Бұл екеуі елге кірген барлық көліктің 53 %-ын құрайды. Қазақстанда Hyundai көш бастап тұрса, экспортта Kia сәл басым — 28 %, ал Hyundai — 27%. Үштікті Škoda түйіндеді (23%).

Модельдер қатарында да аталған үштік тізімнің басында, бірақ Kia мен Hyundai-нің орны ауысқан. 2025 жылдың алғашқы бес айында ең көп экспортталған модель — Hyundai Tucson (561 дана), екінші орынға — Kia Sportage (529 дана), үшінші сатыға Škoda Kodiaq (463 дана) жайғасты.