Электромобиль мен гибрид саудасы 40 пайыз өсті

Көктемнің алғашқы айында әлем бойынша электрлі күштік құрылымы бар 1.7 млн электромобиль мен гибрид сатылды. Rho Motion мәліметінше бұл ақпанмен салыстырғанда 40 пайыз және былтырғы наурыздан 29 пайыз жоғары көрсеткіш. Бірінші тоқсан қорытындысы да өсім көрсетті.

Электрокардың жалпы тоқсандық саудасы 4.1 миллионға жетті, бұл былтырғы ұқсас кезеңге қарағанда 29 % көп. Мұндай көліктер ең көп сатылған ел — Қытай (2.4 млн, +36 %).

Екінші орынға 0.9 млн автомобиль өткізген Еуропа жайғасты, өсім 22 пайызды құрады. Оның ішінде таза электромобильге сұраныс 27 % артты. Жоғары көрсеткіш Италия (+64 %) мен Германияға (+37 %) тиесілі, Ұлыбритания дилерлері алғаш рет 100 мың экземплярдың кілтін табыстады. Францияда мемлекеттің саясаты өзгергендіктен, жалпы сауда 18 % түссе, гибрид алатындар 47 % азайған.

АҚШ-та жарты млн көлік (16 % өсім) өз иесін тапты, алайда сарапшылар Трамптың саясаты бұл нарықтың ары қарай дамуына кедергі келтіруі мүмкін деп отыр. Елде сатылатын электромобильдердің шамамен 40 пайызы шетелден кіреді және оларға енді 25 % салық салынады. Tesla-ға сұраныс 8.6 % азайғанына қарамастан, ел ішінде ең көп сұранысқа ие, одан кейінгі орында Ford және Chevrolet тұр.

Қытайда жыл басында болатын маусымдық құлдырау кезеңінен кейін нарық қалпына келіп жатыр. Наурызда миллионға жуық электромобиль мен гибрид өтті. Трамп енгізген баж салығы Қытай нарығына әсер етпейді, өйткені екі ел арасындағы электромобиль импортының көлемі үлкен емес. Соған қарамастан, АҚШ-та шығатын Tesla Model X пен Model S Қытайда айтарлықтай қымбаттауы мүмкін. Бірақ аспан асты елі бұл мәселені басқа жолмен шешуді жөн көрген сияқты. Reuters хабарлағандай, бұл электромобильдерге тапсырыс қабылдау тоқтады.