Еуропа дәстүрлі моторы бар көліктен бас тартпайды

Еуропарламенттің Қоршаған орта жөніндегі комитеті (ENVI) 4 қарашада 2035 жылдан бастап іштен жанатын қозғалтқышы бар жаңа көлік сатуға толық тыйым салатын ережені жеңілдететін жоспарын ресми түрде мақұлдады деп хабарлады Deutsche Welle.

Заң шығарушылар дәстүрлі мотормен жабдықталған машинаны сатуға толық тыйым салып, 2035 жылға қарай жаңа автомобильдің шығарынды деңгейін 100 % қысқартудың орнына талапты жеңілдететін жүйе енгізбекші.

Жаңа ережеге сәйкес CO₂ шығарындысын азайту талабы 95 %-ға дейін төмендейді. Қалған 5 % квота өндірушілерге бензин, дизельмен жүретін көлікті және гибридті заңды түрде саудалауға мүмкіндік береді. Автоөндіруші Еуроодақ аумағында жасалған экологиялық таза болатты пайдаланса, бұл көрсеткіш 87.5 %-ға дейін кемиді.

Еуропада шыққан ұзындығы 4.2 метрден аспайтын шағын электромобиль есептеу кезінде 1.4 коэффициентін алады. Зауыт мұндай сити-кардың бір данасын шығару арқылы дәстүрлі қозғалтқышы бар модельдің көміртек ізін өтейді. Техникалық тұрғыдан тек жаңаратын био немесе синтетикалық отынмен жүруге бейімделген автомобильдер ресми түрде шығарынды деңгейі нөлге тең машина саналады.

Шағын коммерциялық көлікке қатысты талап та жеңілдейді: зиян шығарынды деңгейін түсіруге арналған 2030 жылғы норма 50-ден 35 %-ға, ал 2035 жылғысы 100-ден 80 %-ға төмендеді.

Енді талапты жеңілдету туралы ұсынысты Еуропарламент депутаттары мақұлдайды. Дауыс беру желтоқсанда өтеді. Сол кезде Еуроодақ кеңесі ресми ұстанымын жариялайды. Кейін Еуропарламент пен ЕО-ға мүше мемлекеттер өзгерісті мақұлдауы қажет.