Басты бет → Жаңалықтар → Toyota Қытайда жаңарған Avalon-ды көрсетті
Toyota Қытайда жаңарған Avalon-ды көрсетті

Toyota Қытайда жаңарған Avalon-ды көрсетті

Ірі әрі жайлы модельдің кемі 9 млн теңге тұрады.

| | 70
Авторы: Манас Иксанов

FAW-Toyota 2027 жылғы топтамаға кіретін Avalon-ды таныстырды. Седан Toyota Camry XV80-нің соңғы буынына ұқсап қалған, бірақ шанағының ұзындығы 5 метрден асатындықтан F-класқа жақын.

Модель TNGA-K платформасына негізделген, күштік құрылымы да Camry-мен бірдей. Гаммада вариатормен бірге 173 ат күшін беретін базалық бензомотор, іштен жанатын қозғалтқышы бар кіші гибрид (152 а.к.) және жалпы қуаты 236 ат күшіне тең гибрид бар. Ол жүз шақырымға 4.6 литр жанармай жұмсайды.

Машина кептеліске тап болса электр күшін пайдаланады, ал жылдамдығы артқанда электромотор мен ІЖҚ қатар қызмет етіп, E-CVT-дің арқасында көлік бірқалыпты қозғалады.

Бренд Avalon-ның арзан нұсқаларына 10.25 дюймдік ортаңғы дисплей, орташа және жақсы жабдықталған көліктерге диагоналі 15.6 дюйм экран орнатады. Аспаптар панелі бәрінде бірдей (8.8 дюйм), проекциялық HUD-дисплей тек үздік түрленімде болады. Мультимедиа Apple CarPlay, Huawei HiCar және ICCOA Carlink арқылы смартфонға қосылады. Динамик саны 8 не 14, сымсыз қуаттағыш (50 Вт) тұр.

Рестайлингтен өткен Avalon бұрынғы TSS орнына су жаңа Toyota Pilot жүйесімен жабдықталды. Арзан 8–11 функциядан тұратын пакет алса, озық автопилотты (жолақта ұстау, автоматты түрде тежеу, бейімді круиз, көрінбейтін аймақтарды сканерлеу) орташа және үздік нұсқалардан ғана табасыз. Мамандар бәріне он қауіпсіздік жастығын қойыпты.

Салон жабдықтарының тізіміне жылынатын және желденетін орындықтар, алдыңғы креслодағы массаж функциясы, электр жетекті диван, күннен қорғайтын перде мен әйнек шатыр кіреді.

Компания автомобильдің жеті комплектациясын ұсынады, бағасы қытайларға ұнайтыны анық:

  • Бастапқы деңгей (Entry-Level/Premium), бензинді 2.0L мен 2.0 HEV кіші гибридінде қолжетімді. Ресми құны 178 800 юаньнан (~12 млн теңге) басталады, бірақ жеңілдікпен 133 800 юаньға (~9 млн теңге) алуға болады.
  • Бизнес-класс (Luxury/Honor/Exclusive) — бұл 2.0 HEV гибриді. 207 800 юань (~14 млн теңге) тұрады, салондар жеңілдікпен 158 000–165 000 юаньға (~10.6-11.1 млн теңге) сатады.
  • Флагман (XLE Premium/Limited Flagship) — 2.5 HEV ірі гибриді. Негізгі бағасы 236 800 юань (~15.9 млн теңге) шамасында, науқан кезінде дилерлер 191 800 юаньға (~12.9 млн теңге) береді.

Аспан асты елінде жуырда жаңарған Camry XV80 саудаға шығады. Қазақстанда қазір жолда жүрген «камридің» ең арзанын салоннан 18.7 млн теңгеге аласыз.