Бүгін Орал — РФ шекарасы (Самара), Ақтөбе — РФ шекарасы (Орынбор), Қостанай — Денисовка және Қандыағаш — Мақат автожолдарында орташа жылдамдықты өлшейтін кешендер іске қосылды. Сонымен елдегі осы жүйе қызмет ететін жол саны 15-ке жетті.
«Қазавтожол» жаңа жол бөліктерінде бақылау аркаларының арасын өлшеу және аппараттарды сертификаттау процесі аяқталғанын хабарлады. Жүйе жоғары жылдамдықты жазып алып, деректі арнайы реестрге жібереді.
2025 жылғы 17 қыркүйектен бастап республикалық трассаларда орташа жылдамдықты қадағалайтын кешендер қызмет етіп жатыр. Жүйе автомобильдің белгілі бір жол бөлігіндегі жылдамдығын есептейді. Камералар көліктің бақылау аркасынан өткен уақытын тіркеп, жүрген қашықтығына қарай жылдамдығын анықтайды. Осылайша, тек камера бар жерде ақырын қозғалатын жүргізушілер айласын асыра алмайды.
Кешен осы уақытқа дейін жалпы үш шақырымға созылып жатқан 11 ақылы жолда жұмыс істеді:
- Астана — Щучинск;
- Астана — Павлодар;
- Астана — Теміртау;
- Шымкент — Қызылорда;
- Шымкент — Тараз;
- Павлодар — Семей — Қалбатау;
- Орал — РФ шекарасы (Саратов);
- Павлодар — РФ шекарасы (Омбы);
- Алматы — Қорғас;
- Көкшетау — Петропавл;
- Ақтөбе — Қандыағаш.
Жыл басталғалы камералар 550 мың ереже бұзу фактісін тіркеген, 163.5 мыңын есептеу арқылы анықтапты. Құзырлы орган аппарат санын жолдағы қауіпсіздікті арттырып, апаттың алдын алу үшін көбейтіп жатыр.
Биыл сәуірде үкімет басшысы Олжас Бектенов Көлік министрлігіне әкімдіктермен бірге қарапайым жолдарға да орташа жылдамдықты тіркейтін камера орнатуды тапсырған. Сенатор Марат Қожаев қала ішіне осындай кешен орнатуды ұсынды.