Қарапайым жолдарда да орташа жылдамдық өлшенеді

2026 жылғы 20 сәуірде премьер-министр Олжас Бектеновтің төрағалығымен құқық бұзу фактілерінің алдын алу жөніндегі ведомствоаралық комиссияның отырысы өтті. Жиында жол қауіпсіздігін қамтамасыз ету шаралары сөз болды.

Ішкі істер министрі Ержан Сәденов жол апатының негізгі себептері ретінде жүргізушілердің тәртіп сақтамайтынын, жол инфрақұрылымының жай-күйін (әсіресе қыста) және автомобильдердің техникалық жағдайын атады. Бас полицейдің айтуынша жол апатының 90 %-ға жуығы жүргізушілердің кінәсінен болады. Орташа жылдамдықты бақылау жүйесінің жолдарды толық қамти алмауы да үлкен проблема болып отыр. Жол апаттарының басым бөлігі (84 %) елді мекендерде тіркеледі.

Көлік министрі Нұрлан Сауранбаев орташа жылдамдықты бақылау жүйесі қазір жалпы ұзындығы 2 мың шақырым болатын сегіз ақылы жол бөлігінде жұмыс істеп тұрғанын айтты.

«Бұл шара жол апатының санын 15 % азайтуға мүмкіндік берді. Оң нәтижені ескеріп, биыл мамырдың аяғына дейін жүйені ұзындығы 2.9 мың шақырымға жететін тағы 18 бөлікке орнатуды жоспарлап отырмыз», — деді министр.

Отырыс соңында премьер-министр Олжас Бектенов бірқатар тапсырма берді:

• Ішкі істер, оқу-ағарту, мәдениет және ақпарат министрліктері, сондай-ақ әкімдіктер жол ережесін сақтау жөнінде ақпарат беру-түсіндіру жұмыстарын күшейтсін. Әсіресе мектеп оқушылары мен ата-аналар арасында бұл бағыттағы жұмысты жандандыру қажет.
• Көлік министрлігі ІІМ ұсынысын ескере отырып, техникалық тексерістен өту жүйесін жаңартсын (газ баллон жабдығы бар машинаны тексеру талабын күшейту, жүк көлігі мен жолаушы тасымалдайтын машиналарға міндетті түрде жарыққайтарғыш таңба орнату).
• Көлік министрлігі әкімдіктермен бірлесіп, орташа жылдамдықты тіркейтін камераны республикалық ақылы жолдардан бөлек, облыстық трассаларға да орнату мәселесін шешсін.
• Әкімдіктер реттелетін жаяу жүргіншілер өткелін көбейтіп, қоршау мен жарық орнатсын, жол таңбасын сапалы етіп сызсын. Елді мекендерде қауіпсіз көлік инфрақұрылымын қалыптастыру қажет.

Бұған дейін сенатор Марат Қожаев қала көшелерінде де орташа жылдамдықты тіркеуді ұсынған.