Екатеринбург — Алматы тас жолының бір бөлігін су басты

«ҚазАвтоЖол» Екатеринбург — Алматы тас жолының Бурылбайтал мен Ақсүйек арасындағы 2151-2214-шақырымын еріген қар суы басып қалғанын хабарлады. Бұған күн күрт жылып, таулы аймақтарда қар еруі себеп болған.

Ұлттық компания өкілдері Kolesa.kz редакциясына айналма жолды су шаймағанын, тек еріген су басып қалғанын айтты. Қазір жол бөлігін қалпына келтірумен айналысатын мердігер ұйым қосымша құбырлар орнатып жатыр. Мамандар су басқан аймаққа арнайы техника жеткізіп, тиісті жол белгілерін орнатып қойды. Жағдайды компанияның Жамбыл облысындағы бөлімі қадағалап отыр.

Өткен-кеткен машиналар Алматы — Отар — Благовещенка — Шу — Хантау — Бурылбайтал бағытымен жүреді.

Біраз уақыт бұрын Қазгидромет Алматы облысын су басу қаупі жоғары екенін хабарлаған.