3 сәуір күні сағат 17:30 шамасында жолға су жайыла бастаған. «Қазватожол» ҰК" АҚ-ның баспасөз қызметі «Ақтөбе — Атырау — Ресей шекарасы (Астраханьға қарай)» тас жолының Ақтөбе облысындағы бөлігі бүлінгенін хабарлады. Осы маңдағы Табантал өзеніндегі көпірде жөндеу жүріп жатқан екен. Оның тіреуі аман, бірақ Алғадан Қандыағашқа дейінгі аралықпен жүруге тыйым салынды.
Мамандар тас пен құм төсегенмен, нәтиже болмаған. Содан жол жөндеушілер қосымша канал қазыпты. Апат болған жерде судың арыны қайтып, бүлінген бөлік жөнделгеннен кейін ғана көлік қозғалысына рұқсат беріледі. Біраз уақыт бұрын осы жолдың Жарлы ауылына жақын бөлігін де су шайып кеткен.
Наурыз аяқталып, сәуір басталған шақта көп өңірде жағдай нашарлағанын айта кеткен жөн. ҚР ТЖМ берген мәлімет бойынша БҚО, Ақтөбе және Павлодар облыстарында қауіп анағұрлым жоғары.
Ақтөбенің ортасында ағып жатқан Сазды өзенінің деңгейі күрт көтерілді. 31 наурызда Батыс-2 ауданына су жайылып, кішкентай қыз суға батып кете жаздады. Аймақтағы Шилісай, Жіңішке және Песчанка өзендері де арнасынан асып, маңындағы үйлерге жайылды. ТЖД мамандары жағаға құм толы қап қойып, өзен арнасын тазалап жатыр.
Батыс Қазақстан облысына қарасты Жәнібек ауданындағы Жақсыбай ауылында 170, Таловка ауылында 2 үйді су басты, Қаратөбе ауданында да бірнеше ауыл апаттан зардап шегіп, бір мектеп су астына кеткен. Павлодар облысындағы Рождественка ауылында да жағдай мәз емес.
Комментариев: 0