Алдағы уақыттағы ауа райын болжаған «Қазгидромет» РМК «Ақпан айында температуралық фон жоғарылап, қатты жаңбыр жауған жағдайда, Қазақстанның оңтүстігі, оңтүстік-шығысы мен шығысындағы тау өзендерінде еріген қар және жаңбыр суының ауқымды тасқыны орын алуы мүмкін» деп жазды.
Синоптиктердің айтуынша Қазақстанның жазық өзендерінде көктемгі тасқын су ағынының күтілетін көлемі 2023 жылғы 1 ақпандағы жағдай бойынша гидрометеорологиялық бақылау мен өлшеу нәтижесіне сәйкес жасалды. Негізгі болжам наурызда дайын болады.
Метеорологтардың зерттеуі бойынша жауын қатты жауса, Павлодар, Ұлытау облыстарына төнетін қауіп деңгейі орташа, ал су мөлшері шектен аспайтын өңір — Маңғыстау облысы. Басқа облыстарда су басу қаупі өте жоғары.
Түркістанда синоптиктердің болжамы расталып, 2 ақпан күні нөсер мен қар еруі салдарынан тау өзендері арнасынан асты. Түркістан, Кентау қалалары мен Бәйдібек, Ордабасы, Сауран аудандарында жолдар мен біраз үйді су басты. Қызыл судың қарқыны қатты болғаны соншалық, қалаларалық трассадан көліктерді ағызып ала кетті.
Қазір аймақта жағдай біршама оңалды, бірақ көктем әлі келе қойған жоқ. Табиғат ел тұрғындарына қашан тосын мінез көрсететіні белгісіз. Мәселен, былтыр Қазақстан жолдарын 30 рет су басқан.
4 ақпанда Төтенше жағдайлар департаменті Алматы облысында қар суына байланысты тас жолдар жабылатынын хабарлады.
Комментариев: 0