Мәжілісмен Айқын Қоңыров ҚР премьер-министрі Әлихан Смайыловқа депутаттық сауал жолдап, техникалық тексеруді алып тастауды ұсынды. Депутаттың баяндауынша, қазір Қазақстанда 2.7 миллионға жуық көлік құралы (елдегі барық машинаның 70 пайыздан астамы) жыл сайын техникалық тексерістен өтуге міндетті. Көлік тексеретін орындар 7-13 миллиард теңге табыс табады. Бірақ машинаны тексеру процесі формалды өтеді және саланы сыбайлас жемқорлық жайлаған. ҚР ИИДМ Көлік комитеті жалған техбайқау картасын беретіндердің жолын кесе алмай отыр.
2021 жылы көлік комитетінің қызметкерлері құрған ұйымдасқан қылмыстық топ әшкереленді. Аталған топ техникалық тексеріс жүргізбей-ақ 260 мыңнан аса диагностикалық карта рәсімдеп, 1 миллиард теңгеге жуық пайда тапқан.
«Шенеуніктер бұл саладағы жемқорлықпен күресудің орнына оған өздері басшылық еткен. Осылайша техникалық тексеру формалды шараға айналып, азаматтардың қалтасына артық салмақ түсіріп отыр. Саланы жемқорлық жайлағандықтан, техникалық тексеру көлік иесі мен өзге де жол қозғалысына қатысушылардың қауіпсіздігіне айтарлықтай әсер етпейді», — деді Айқын Қоңыров.
Депутат автобус, жүк көлігі және таксиден басқа көлік құралын жүргізетіндерді техникалық тексеріс пен әкімшілік жауапкершіліктен босатуды ұсынды.
Айта кетейік, техникалық тексеріс шынайы өтпейтіндіктен, оны алып тастау туралы ұсыныс бұған дейін де бірнеше рет ұсынылған. Бірақ мұндай шешімді жөн көрмеген шенділер саланы ретке келтіруге уәде беруден жалықпады. Алайда әлі ештеңе өзгерген жоқ.
Комментариев: 0