Сенбі, 3 қазанда Ақтаудағы қан орталығының алдында Audi 80-мен түйіскен Hyundai жедел жәрдем көлігі аударылды. Апаттан төрт адам зардап шеккен, екеуі ауруханаға жеткізілді.
Келесі оқиға Оралға жақын маңда болды. 3 қазан күні Audi A8 Шаған өзеніне құлап кетті. Сол сәтте машинада үш бала отырған екен. Өкінішке орай, оларды суға батқан көліктен шығару мүмкін болмады. «Мой ГОРОД» порталындағы ақпаратқа сүйенсек, балалар көлік ішінде ойнап отырған. Олар моторды іске қосып, селекторды D режиміне ауыстыруы мүмкін деген болжам бар, себебі туыстарының айтуынша, машина өзенге бар жылдамдығымен түсіп кетіпті. Полиция «Қауіпті жағдайда қалдыру» бабы бойынша қылмыстық іс козғады.
Сенбінің кешінде Ақтоғай — Шолақсор тас жолында ВАЗ-2104 трактор тіркемесіне соғылған. Сұмдық апаттан жеңіл көліктің жүргізушісі мен ондағы төрт жолаушы жан тапсырды.
4 қазанға қараған түні Алматыдағы № 7 аурухана алдында Toyota Camry жаяу жүргіншіні қағып кетті. Седан Райымбек даңғылымен батыс бағытта қозғалып бара жатқан, ал ер адам жолды рұқсат етілмеген тұстан кесіп өтпек болыпты. Жол ережесін елемеген азамат оқиға орнында ажал құшты.
Жексенбі, 4 қазан күні Атырау — Ақтөбе тас жолында Renault Duster мен Geely соқтығысты. Соққының қатты болғаны сонша, екі жүргізуші мен жолаушылар тіл тартпастан кеткен. Бұл жан түршіктіретін апаттан 9 адам қаза болды.
Дәл сол күні Алматы — Талдықорған тас жолында Kia Rio жол ортасындағы қоршауға соғылды. Темір қоршау седанды тесіп өткен. Жүргізушіге қатысты ақпарат берілмеді.
Комментариев: 0