Тағы бір «нексия» тарих қойнауына кетіп барады. UzAuto жыл аяғына қарай модельді конвейерден алады. Арзан әрі ыңғайлы саналатын Nexia 2023 жылы шыға бастайтын Chevrolet Onix-ке жол береді.
Ал Қазақстан тұрғындары жаңа «Нексияны» күзден бастап көрмейтін сияқты. Өйткені UzAuto модельдің соңғы легін өз тұрғындарына ғана сатады. Экспортқа шығуға тиіс көліктер де Өзбекстанда саудаланады.
Қазір Nexia біздің елде ең көп сатылатын 5 машина тізімінде тұр. Ай сайын автосалондар Қостанайдағы зауыттан шыққан мың машина өткізеді. Бірақ соңғы екі жылда Gentra мен Cobalt өндірісі артты. Биылғы жеті айда 52903 «кобальт» шықса, «нексия» саны 14 мыңнан сәл асады.
Тарихтан бір үзік сыр
2022 жылы модель ресми түрде 20-ға толады. Т200 индексті Daewoo Kalos хетчбэгі мен седаны нарыққа алғаш 2002 жылы шыққан.
2005 жылы жаңарып, Т250 индексіне ие болды. Содан бері іші де, сырты да еш өзгерген емес. Автомобиль тек түрлі нарыққа бейімделіп, Daewoo, Chevrolet, ZAZ және Pontiac сынды брендтермен шықты. Кезінде Қазақстан мен Ресейде Ravon маркасымен сатылған. Ал модель атауы тіпті көп: Kalos, Gentra, Aveo, Lova, G3 Sedan, Wave, Vida… 2015 жылдан бері Nexia атауымен танымал.
2010 жылы Өзбекстанда ең танымал «Матизді» алмастырған Chevrolet Spark-тың да ғұмыры аяқталуға жақын. Бес есікті шағын көлік біздің нарықта үлкен жетістікке жетпесе де, көрші елдің автоөндіріс саласында өшпес із қалдырды. Бұл көлікті құрастыру қарқыны едәуір бәсеңдеген. Оңтүстіктегі көрші 2020 жылы 16 000 Spark шығарса, биыл небәрі 7548 автомобиль конвейерден түсті.
Әзірше кішкентай көлікке балама жоқ, сондықтан зауыттағы мамандар одан қымбатырақ Tracker кроссоверін құрастырады.
Комментариев: 0