Chery Tiggo 9 Қазақстанда қанша тұрады

Брендтің Tiggo 9 деп аталатын флагманы бір ғана комплектацияда, бірақ ауқымды жабдықтар тізімімен сатылады. Ресми саудасы басталмаса да, сайтта бағасы мен комплектациясы туралы мәлімет жарияланды. Машинаның құны — 19 990 000 теңге.

Қытайда Tiggo 8L ретінде танымал автомобиль Қазақстанда Tiggo 9 деген атау алды. Өлшемдері — 4810×1925×1741 мм, дөңгелек базасы — 2.8 метр, клиренсі — 200 мм. Жүксалғыш көлемі — 200-2150 литр. Модель тек үш қатарлы салонмен сатылады.

Аспасы толығымен тәуелсіз көлік 245 ат күшін (375 Нм) беретін 2 литрлік турбомотормен жүреді. Қозғалтқышы 8 сатылы автоматпен және толық жетек жүйесімен жұптаса жұмыс істейді. Машина алғашқы жүздікті 8 секундта еңсереді, максимал жылдамдығы — 220 км/сағ. Өндіруші АИ-92 бензинін құюға рұқсат береді.

1 / 6

• 
• 
• 
• 
• 
• 

1 / 6

Жалғыз Flagship комплектациясына 20 дюймдік дискілер, диодты жарық техникасы, панорамалы шатыр кіреді. Салонында 10.3 дюймдік аспаптар панелі мен 15.6 дюймдік ортаңғы тачскрин, мөлдір капот функциясына ие айнала шолу камерасы, 14 динамик (кейбірі бас тірегіште), екі аймақты климат-бақылау жүйесі болады. Бірінші және екінші қатардағы орындықтарда жылыту және желдету функциясы бар, ал алдыңғылары массаж жасайды. Салоны қоңыр былғарымен қапталады.

Кроссовер тізе тұсын қорғайтын және ортаңғы жастықшаны қосқанда 10 эйрбэг, құрамына бейімді круиз-бақылау мен тұрақ көмекшісінен бөлек жүргізушінің шаршағанын ескертетін функция кіретін ассистенттер кешенін алады.