Былтыр ақылы жолдарда 8.1 млрд теңге жиналды

Қазақстанда ақылы режимге көшкен 11 жол бөлігінде 8.1 млрд теңге жиналғанын ҚР ИИДМ баспасөз қызметі хабарлады.

Ақшаның көбі 682 шақырымға созылған Нұр-Сұлтан — Теміртау, Нұр-Сұлтан — Щучинск, Алматы — Қапшағай және Алматы — Қорғас жол бөліктерінен түсіпті. Жүргізушілер мұнда 6.9 млрд төлеген.

Қалған 1.2 млрд теңге жыл соңына қарай іске қосылған Тараз — Қайнар, Шымкент — Қызылорда, Шымкент — Тараз, Шымкент — Өзбекстан шекарасы, Талдықорған — Қапшағай, Көкшетау — Щучинск, Нұр-Сұлтан — Павлодар тас жолдарында жүрген жүргізушілердің қалтасынан алынды.

Жиналған ақша сол жолдарды, жол бойындағы инфрақұрылым мен құрылғылардың күтіміне жұмсалды.

Бұрын қолданысқа берілген жолдарға шлагбаум қойылған, ал кейінгілерінде шлагбаум жоқ, олар жанасымсыз төлем жасау әдісімен қызмет етіп тұр. Екі жағдайда да жол ақысын Kolesa.kz мобильді қосымшасы арқылы төлеуге болады.